Nga Bujar Leskaj
Fjala në Kuvend, 30 mars 2023:
Fjala në Kuvend, 30 mars 2023:
𝗧𝗲 𝗻𝗱𝗲𝗿𝘁𝗼𝗷𝗺𝗲 𝗠𝘂𝘇𝗲𝘂𝗻 𝗲 𝗠𝗲𝗺𝗼𝗿𝗶𝗲𝘀 “𝗩𝗶𝗹𝘀𝗼𝗻 𝗕𝗹𝗹𝗼𝘀𝗵𝗺𝗶- 𝗚𝗲𝗻𝗰 𝗟𝗲𝗸𝗮”
Së pari dua t’i bëj me dije Kuvendit, se përpara një jave, ne një grup dashamirësish, studiues të artit, politikanë, të rinj, të reja përkujtuam 75- vjetorin e lindjes së poetit hero, Vilson Blloshmi.
Poeti Vilson Blloshmi lindur në 18 mars 1948 dhe poeti tjetër, Genc Leka, lindur në 23 mars 1941, dihet që janë pushkatuar nga diktatura në 17 korrik 1977.
Fakti që unë marr nismën për ta përkujtuar në këtë sallë të Kuvendit të Shqipërisë, pavarësisht numrit të pakët të deputetëve në radhë të parë është vlerësimi, obligimi, përulja përpara figurës së madhe, figurës artistike të këtyre dy poetëve; së dyti përulja përpara qëndresës së këtyre poetëve të pushkatuar nga regjimi komunist dhe, së treti, e ç’ka është më kryesorja në këtë adresim; kam një kërkesë për ministren e Kulturës që besoj se do t’i përcillet që shtëpia- muze e Vilson Blloshmit e ndërtuar në fund të viteve 1800 në Bërzeshtë të shpallet Monument Kulture, të restaurohet dhe në këtë shtëpi të ndërtohet muzeu i poetëve Vilson Blloshmi dhe Genc Leka.
Vëllai i tij, heroi i gjallë, Bedri Blloshmi, tashmë ka një dhomë muze ku ndodhen relike e dokumente të shumta në lidhje me përndjekjen dhe mbi krimin makabër që regjimi komunist ushtroi ndaj këtyre dy poetëve; ndodhen vëllime të ndryshme të dosjeve të ndjekjeve të këtyre dy martirëve nga Sigurimi famëkeq i Shtetit, por edhe vëllime të korrespondencës letrare apo poezive të tyre dhe botime të ndryshme që Bedri Blloshmi ka përgatitur në këto vite.
Mendoj se do të ishte në nderin e ministres së Kulturës dhe deputetëve të Elbasanit dhe, specifikisht të Librazhdit që të ndërtojmë muzeun “Vilson Blloshmi- Genc Leka” në godinën e vjetër në Bërzeshtë, i cili të shërbejë si një vend pelegrinazhi për qindra mijëra të rinj, studiues apo dashamirës të artit, etj.
