Sipas informacioneve të para, shpërthimi është shkaktuar nga një rrjedhje gazi në ndërtesën trekatëshe ku ndodhet Akademia Amerikane e Parisit e muzikës, në rrugën Saint-Jacques në lagjen e 5-të të kryeqytetit francez, ndërsa Le Parisien raporton se shtatë persona janë lënduar rëndë dhe nëntë me lëndime të lehta. Ndërtesa e Akademisë është shembur pjesërisht.
“Banorët e qarkut të 5-të, sapo ka ndodhur një shpërthim gazi (nga një rrjedhje) në Place Alphonse Laveran, në lagjen Val-de-Gras, ndërtesat janë në flakë, qëndroni larg për të lejuar ndërhyrjen e zjarrfikësve”, ishte mesazhi nga nënkryetari i bashkisë Eduard Sivel, në një kohë kur më shumë se 200 zjarrfikës po punojnë për të vënë nën kontroll zjarrin dhe 9 mjekë ndodhen në vendngjarje për të ofruar ndihmën e parë.
“Dëgjova një zhurmë të madhe, ktheva kokën dhe pashë një top zjarri dhe u largova”, tha një dëshmitar okular për Le Parisien, duke shtuar: “Zhurma ishte shurdhuese. Policia mbërriti shpejt dhe na tha të evakuonim zonën”.
“Dëgjuam një shpërthim të madh. Ne pamë tym të zi dhe rrënoja kudo (…) Menduam se ra rrufeja! Kishte erë gazi në rrugë”, tha një banor i zonës për gazetën Liberation.
Policia e Parisit u kërkoi gjithashtu qytetarëve që të shmangnin zonën në mënyrë që shërbimet e urgjencës të mund të ndërhynin.
