Një 37-vjeçar, i cili po udhëtonte me makinën e mbushur me municione, është arrestuar nga policia. Gjatë kontrollit të automjetit të tij, në lagjen “Valas” të Cërrikut, u zbuluan në vendin e gomës rezervë në bagazhin e makinës, një kallashnikov dhe municion luftarak.
37-vjeçari me iniciale A. Zh., banues në Berat, u arrestua për veprën penale “Mbajtja pa leje dhe prodhimi i armëve, armëve shpërthyese dhe i municionit”;
Ndërsa u arrestua edhe pasagjeri në automjet, 32-vjeçari me iniciale A. K., banues në Berat, për veprën penale “Moskallëzimi i krimit”.
Njoftimi i policisë:
Kishte fshehur një armë zjarri kallashnikov dhe municion luftarak, në bagazhin e automjetit që drejtonte, arrestohet në flagrancë 37-vjeçari.
Vihet në pranga edhe pasagjeri në automjet, për moskallëzim krimi.
Sekuestrohen arma e zjarrit kallashnikov dhe municioni luftarak.
Specialistët e Seksionit për Hetimin e Narkotikëve, në bashkëpunim me shërbimet e Forcës Operacionale të DVP Elbasan, në vijim të punës për goditjen e paligjshmërisë në fushën e armëmbajtjes pa leje, bazuar edhe në informacionet e siguruara nga inteligjenca informative për dy shtetas që qarkullonin me armë zjarri, kanë organizuar operacionin policor të koduar “Covered”.
Si rezultat i këtij operacioni, në lagjen “Valas”, Cërrik, në bashkëpunim me shërbimet e Komisariatit të Policisë Elbasan, janë kapur në flagrancë dhe janë arrestuar shtetasit:
-A. Zh., 37 vjeç, banues në Berat, për veprën penale “Mbajtja pa leje dhe prodhimi i armëve, armëve shpërthyese dhe i municionit”;
-A. K., 32 vjeç, banues në Berat, për veprën penale “Moskallëzimi i krimit”.
Gjatë kontrollit në automjetin me drejtues shtetasin A. Zh. dhe pasagjer shtetasin A. K., shërbimet e Policisë gjetën një armë zjarri kallashnikov dhe një sasi municioni luftarak, të cilat u sekuestruan në cilësinë e provës materiale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
