Një incident i pazakontë ndodhi sot në seancën plenare. Deputeti i PD-së Flamur Noka ka goditur me librin e rregullores së Kuvendit një operator i cili sipas tij po filmonte telefonat e deputetëve.
Noka tha se kamera ishte e fokusuar në telefonin e kreut të PD, Sali Berishës, i cili kishte hapur një video denoncuese në “WhatsApp”.
Por pas kësaj ka ardhur reagimi i kryetares së Kuvendit Lindita Nikolla, e cila i tërhoqi vërejtje Nokës për të treguar respekt ndaj medias së lirë.
“Kam dhe një vërejtje ndaj jush zoti Noka, nuk mund të reagoni ndaj medias ashtu duke i qëlluar me rregulloren e parlamentit. Respekte ndaj medias së lirë, nuk mund të rri pa reaguar kur shoh një veprim të tillë. Nuk janë kameramanët e mi, por të medias së lirë”, tha Nikolla.
Në përgjigje Noka deklaroi se është e turpshme të filmohen telefonat e deputetëve të parlamentit.
“Është turp që filmohen telefonat e deputetit”, tha deputeti i PD.
