Stadiumi “Air Albania” mirëpret sot në orën 20:45 ndeshjen Shqipëri-Çeki, në një atmosferë të jashtëzakonshme.
Organizimi për këtë takim ka shumë ditë që ka nisur nga FSHF-ja, por ka ngritur në këmbë edhe shumë institucione shtetërore.
Ndërkohë, atmosfera ishte befasuese edhe dje, ku organizatorët vendosën në çdo ulëse të stadiumit “Air Albania” nga një plis, që do të ketë mundësi ta vendosi në kokë çdo tifozë. Imazhet ishin spektakolare, ndërsa pikat ngjyra kuq e zi në çdo cep të stadiumit, me një dekori fantastik.
Mësohet se për ta bërë edhe më të bukur atmosferën, sot para ndeshjes do të performojë këngën simbol, “Mora fjalë”, këngëtarja Shkurte Fejza. Ajo është ftuar nga FSHF-ja të këndojë sot para 22 mijë tifozëve të pranishëm.
