Gjykata e Posaçme kundër Korrupsionit dhe Krimit të Organizuar la në fuqi masën e sigurisë detyrim paraqitje dhe ndalim për daljen jashtë Shqipërisë të ishkryeministrit Sali Berisha.
Gjykata ka urdhëruar kryedemokratin Sali Berisha që të paraqitet 2 herë në muaj pranë oficerit gjyqësor në SPAK. Kjo, pasi GJKKO i ka vendosur Berishës ditën e djeshme masën e sigurisë detyrim paraqitje. Berisha duhet që të shkoj çdo të hënë të parë dhe të tretë të muajit në SPAK. Po ashtu, është theksuar se ndalohet që Berisha pa autorizimin e gjykatës të dalë nga vendi.
Sipas vendimit të GJKKO, “urdhërohet shtetasi nën hetim Sali Berisha të paraqitet të hënën e parë dhe të tretë të çdo muaji ora 10:00 para oficeres së Policisë Fjyqësore Adelajda Metaj, pranë Prokurorisë së Posaçme kundër Korrupsionit dhe Krimit të Organizuar”. “Urdhërohet shtetasi nën hetim Sali Berisha të mos largohet nga territori i Republikës së Shqipërisë pa autorizimin e gjykatës, në referim të nenit 233 pika 1 të K.Pr.Penale “ndalimi i daljes jashtë shtetit. Ndalohet përdorimi i pasaportës dhe i dokumenteve të tjera identifikuese të vlefshme për daljen jashtë shtetit, për shtetasin nën hetim Sali Berisha”, – thuhet në vendimin e GJKKO për masën e sigurisë ndaj ish-Kryeministrit.
Mësohet se Berisha duhet të paraqitet para oficerit të Policisë Gjyqësore në datat 6 dhe 20 Nëntor. Ndërkohë, gjykata bën të ditur gjithashtu se dy avokatet e caktuar nga shteti për Sali Berishën, Rabije Cenalia dhe Jalldiz Kastrati janë tërhequr dhe nuk morën përsipër realizimin e mbrojtjes për ishKryeministrin.
Në këto kushte, GJKKO caktoi një tjetër avokate kryesisht, Valentina Todoreskun, e cila u njoh me aktet e dosjes dhe kërkoi që të revokohet masa e sigurisë. Por trupa gjykuese në dhomën e këshillimit mori vendim që ndaj Sali Berishës të qëndrojë në fuqi e njëjta masë sigurie, ajo e detyrimit të paraqitjes dhe mosdalje nga vendi. Ndërkohë, ishkryeministri Sali Berisha kërkoi dje përmes një kërkese përjashtimin e gjyqtares së kësaj çështjeje, Irena Gjoka, por GJKKO e hodhi poshtë kërkesë me argumentimin si “të pabazuar në prova dhe në ligj”.
Ish-kryeministri Sali Berisha akuzohet për korrupsion pasiv në lidhje me procedurat e privatizimit të ishkompleksit “Partizani”, çështje për të cilën akuzohet edhe dhëndri i tij, Jamarbër Malltezi, i cili është me masë sigurie arrest në burg, si dhe ndërtuesi Fatmir Bektashi, me masë sigurie detyrim paraqitje dhe ndalim për të dalë jashtë Shqipërisë. Kufizimin e lirisë, Sali Berisha e konsideron antikushtetuese, pasi sipas tij SPAK duhet të kishte marrë më parë autorizim nga Parlamenti për t’i kufizuar lirinë një deputeti. Edhe seanca e djeshme u shoqërua me ngërçe, teksa avokatet e legjitimuara paradite, Jalldiz Kastrati dhe Rabije Cenalia, në nisje të seancës në orën 15:00, hoqën dorë nga mbrojtja. Për 2 orë e gjysmë, gjyqtarja Irena Gjoka, përjashtimi i të cilës sipas kërkesës së ish-Kryeministrit nuk u pranua, caktoi një tjetër avokate shteti, Valentina Todoresku.
Kjo e fundit pranoi të mbrojë interesat e Sali Berishës, duke zgjidhur ngërçin në të cilin ishte futur procesi prej 3 ditësh. Sipas vendimit të gjykatës, ish-kryeministri është i detyruar që të hënë e parë dhe të fundit të çdo muaji të paraqitet në Policinë Gjyqësore. Data e parë e paraqitjes së tij është 6 nëntori. Avokatët e zgjedhur nga ish-kryeministri, edhe pse u paraqitën në dy seanca, të mërkurën braktisën procesin duke e konsideruar si të paligjshëm sa kohë nuk iu pranuan dy kërkesa, më kryesorja ajo për dërgimin e vendimit për masën e sigurisë ndaj Berishës pa leje nga Kuvendi në Kushtetuese. Emri i Valentina Todoreskut ka dalë në dritë pas përfundimit të seancës.
“Mbrojtësit e caktuar kryesisht nuk morën përsipër realizimin e mbrojtjes dhe në këto kushte, referuar listës së avokatëve kryesisht, gjykata caktoi si avokate kryesisht av.Valentina Todoresku, të cilës i la kohën e nevojshme për t’u njohur me aktet e kërkesës me objekt marrjen në pyetje të shtetasit nën hetim Sali Berisha”, – thuhet në njoftimin e gjykatës. Vendimi për zëvendësimin e prokurorëve erdhi pas dy avokatët e Berishës, Genc Gjokutaj dhe Sokol Mëngjesi braktisën sallën e gjyqit. Më pas, gjykata caktoi si mbrojtës avokatin Artan Simani, i paguar nga shtetit. Ky i fundit kishte bërë një status të papërshtatshëm dy ditë më herët për z.Berisha dhe më pas gjykata vendosi ta përjashtonte.
