Gazetari Artan Hoxha i është përgjigjur kryetarit të Bashkisë së Tiranës, Erion Veliaj, i cili në përpjekje për ta intimiduar, ka bërë insinuata për lidhje të tij me krimin dhe biseda në SKY ECC.
I ftuar në emisionin “Të Paekspozuarit” në MCN TV, Hoxha tha se sulmet e Veliajt bëhen për ta intimiduar. Gazetari deklaroi se ka folur në EncroChat dhe SKY me disa persona, pikërisht për Erion Veliajn. Kujtojmë se Hoxha deklaroi disa ditë më parë në emisionin “Të Paekspozuarit”, se kur ka nxjerrë shkresën e Erion Veliajt për inceneratorin e Tiranës, ka patur persona nga burgjet që e kanë telefonuar për ta intimiduar.
“Tani ndërsa është live, më ka sulmuar. Ka thënë se nuk intimidohem nga gazetarë që flasin për makinat e parkuara, që njihen me lidhje me krimin dhe dalin nga biseda me SKY ECC. Ndryshe nga gazetarja Ola Xama, mua nuk më mbron njeri.
Ai sot kishte stisur një dalje, në momentin kur kaluan tre ditë dhe u duk sikur u harrua historia e inceneratorëve. Ai ka stisur një dalje dhe është marrë me mua.
Unë nuk jam as drejtor, as kryeredaktor, as te listëpagesat e bashkisë Tiranë, që është furnitori i gjirizit të medias. Ai del dhe thotë që dal në bisedat e SKY. Unë e kam thënë publikisht që në 2020, me telefon në dorë dhe kam thënë ky është telefon që përdor krimi i organizuar. Madje dënoncimi i parë është bërë nga unë në Daily Express, media britanike.
Me gjithë këtë hall që ka ai, pse bën këtë goditje? Ka evidentuar kush janë njerëzit dhe mediat që mund t’i krijojnë probleme. Ka zgjedhur të qëllojë tek e tek.
Statusi i parë që bëra unë, që doli kërkesa e SPAK për Kuvendin, ishte kjo, citoja të ndjerin Pjetër Arbnori, që thoshte janë specialista… Për të mbuluar një skandal të madh, duhet të bësh diçka tjetër, si kjo e arrestit të Berishës.
Inceneratorët, në të gjithë mediat nuk janë prezentë. Sot janë marrë me Kuvendin, hetimet e SPAK për raste të tjera, me kolegun Qyno që është mbajtur me orë të tëra dhe i është bërë kontroll te banesa. Mua me ka ndodhur vetë që më kanë marrë telefonat.
Veliaj u pyet se përse Tirana nuk ka incenerator. Ai tha se ndërtimi i inceneratorit do të fillonte pas pesë viteve të para. Ai është akoma me idenë që inceneratori do të ndërtohet.
Ai thotë gjithashtu, “ata që merren me makinat e parkuara, dalin ne EncroChat me banda”.
Po i them Veliaj, po u hap SKY dhe EncroChat, do të dalin aty persona që kanë folur me mua për Erion Veliajn. Prandaj i them mos e rrih shumë këtë shteg, se nuk e di ku të çon.
Ajo që i kërkojmë SPAK-un është të hetojë politikanët, se banditët i dimë ne. Politikanët që kanë folur me kriminelë që u financojnë fushata elektorale. Shiko si bëhen njëlloj në një moment, edhe Berisha edhe Erion Veliaj. Vijmë te kjo pjesë, jemi nën këtë presion që të mbyllim gojën”, tha Hoxha.
