Leonard Farruku, një emigrant shqiptar që vrau veten muajin e kaluar në një anije që strehonte emigrantë në Mbretërinë e Bashkuar, u varros të mërkurën në afërsi të kryeqytetit shqiptar, Tiranë, në një funeral ku morën pjesë të afërmit e tij.
Reuters që ndoqi nga afër funeralin shkruan se “vdekja e Farrukut, 27 vjeç, ringjalli polemika rreth anijes Bibby Stockholm, që strehon azilkërkuesit në Anglinë jugore që grupet e të drejtave e kanë krahasuar me një anije burgu, por që autoritetet thonë se është e nevojshme për të ulur kostot e akomodimit të emigrantëve”.
“Ai tha se u trajtua shumë keq atje … si një kafshë,” tha tezja e Farrukut Drita Kapllani për Reuters, duke fshirë lotët. “Shpirtrat dhe zemrat tona do të kenë paqe vetëm kur e vërteta të dalë në shesh.”
Ministria e Brendshme britanike tha, “Ky ishte një incident tragjik dhe mendimet tona janë me të gjithë të prekurit. Kjo është duke u hetuar nga policia dhe ekspertët.”
Vdekja e tij më 12 dhjetor ishte një tronditje për familjen e Farrukut, të cilët thanë se ai shpërndante pica në të gjithë kryeqytetin shqiptar, ishte i qetë dhe punëtor, megjithëse si shumë të rinj shqiptarë ai luftoi për të fituar më shumë para.
