Gazeta më e madhe britanike, Daily Mail shkruan sot se FBI është alarmuar nga çështja shqiptare e Charles McGonigal dhe ka urdhëruar një hetim të çdo dosje që ka kaluar në duar McGonigal në 22 vite.
Po ashtu, Daily Mail, ka publikuar edhe dokumentin e FBI që fundos Edi Ramën dhe McGonigal, pasi thekson se hetimet korruptive për llogari të Ramës, që u kryen nga McGonigal, u kanë kushtuar taksapaguesve amerikanë.
Bëhet fjalë për hetimin e iniciuar dhe ‘sponsorizuar’ nga Edi Rama për të stisur një hetim ‘për lobimin rus’ në SHBA kundër Partisë Demokratike dhe kryetarit të saj, i cili për një kohë të gjatë u përdor nga kryeministri dhe Sali Berisha më pas për të sulmuar Lulzim Bashën.
“Nga rishikimi i brendshëm rezultoi se ka qenë një sipërmarrje e madhe, që kërkon një shpenzim të panevojshëm të burimeve të konsiderueshme qeveritare,” thuhet në memon e FBI.
Në mbështetje të këtij fakti, prokurorët bashkangjisin letrën e një agjenti të FBI-së ku janë redaktuar disa të dhëna identifikuese.
Letra mban datën 16 mars 2018 dhe zyrtari që e shkruan pyet se “pse në kushtet e burimeve të kufizuara dhe faktin që shumë zyra në terren kanë vështirësi të hetojnë kërcënime” më serioze, zyra e Nju Jorkut kërkon hapjen e një hetimi për të meta në regjistrimin si FARA, duke e paraqitur këtë si kërcënim për sigurinë kombëtare?”
Më tej, zyrtari shkruan se kërkon që të jetë në gjendje t’u përgjigjet eprorëve nëse lindin pyetje. “Do të doja t’ju shpjegoja atyre se pse po punojmë për një çështje SIM/FARA të lidhur me Shqipërinë, kur çdo ditë unë luftoj për burime për disa çështje të sigurisë kombëtare që kanë lidhje me disa vende që paraqesin kërcënim të lartë si..”, thuhet në letër ku emrat e vendeve të tjera janë të fshira.
Ndërkohë, Daily Mail shkruan se është gozhdues konstatimi që bëhet për McGonigal.
“Kjo përbën në thelb korrupsion që minon transparencën dhe besimin në integritetin e Degës Ekzekutive të qeverisë. I pandehuri ishte betuar se do të hetonte dhe parandalonte krimet kundër Shteteve të Bashkuara dhe jo t’i kryente ato”, thuhet në dokumentin që i referohet çështjes së nisjes së një hetimi të stisur dhe të porositur kundër PD dhe kryetarit të saj, Lulzim Bashës.
