Islanda ka shpallur gjendjen e jashtëzakonshme pas shpërthimi të vullkanit. Mëosohet se llava ka dëmtuar tubat kyç të ujit të nxehtë dhe energjisë.
BBC raporton se mijëra njerëzve në gadishullin Reykjanes u është kërkuar të kufizojnë përdorimin e ujit të nxehtë dhe të energjisë elektrike pasi tubat mund të duhen ditë për t’u rregulluar.
Ka shqetësime se tubacione të tjera thelbësore pranë stacionit të energjisë Svartsengi mund të preken nëse rrjedha e lavës nuk lehtësohet. Ky është shpërthimi i tretë i tillë në gadishull që nga dhjetori.
Sipas pamjeve ajrore shihet një çarje prej 3 km të gjatë (1.8 milje) në sipërfaqen e Tokës. Tymi i ndriçuar nga llava mund të shihet në kryeqytetin, Reykjavik, afërsisht 40 km (25 milje) larg.
Laguna Blu, një nga atraksionet kryesore turistike të Islandës, është detyruar të mbyllet sërish për shkak të rrjedhave të llavës.
Departamenti i Mbrojtjes Civile dhe Menaxhimit të Emergjencave të Islandës tha se po përpiqej të kuptonte se si të garantonte furnizimin me ujë të ngrohtë për më shumë se 20,000 njerëz të cilëve thuhet se u është ndërprerë aksesi.
Vullkanologia Dr Evgenia Ilyinskaya tha për BBC se stacioni i energjisë Svartsengi është i mbrojtur në një farë mase nga barrierat që janë ndërtuar rreth tij, ka tuba që ofrojnë ujë të nxehtë për 30,000 njerëz të tjerë në të gjithë gadishullin që janë në rrezik.
Megjithatë, ajo tha se shpresa ishte që shpejtësia e rrjedhës së lavës së shpejti do të binte, në një mënyrë të ngjashme me shpërthimet e mëparshme dhe tubacioni do të ishte i padëmtuar.
Sipas Zyrës Meteorologjike Islandeze, fuqia e shpërthimit është në rënie.
Dr Ilyinskaya, një profesor i asociuar i vullkanologjisë në Universitetin e Leeds, tha se shpërthimi i së enjtes ishte në të njëjtën zonë si ai i dhjetorit, që do të thotë se nuk ka gjasa të shkaktojë më shumë dëme në qytetin e braktisur të Grindavik.
Islanda ka 33 sisteme vullkanike aktive dhe ndodhet mbi atë që njihet si Kreshta e Mesme të Atlantikut, kufiri midis dy prej pllakave tektonike më të mëdha në planet.
