Një ngjarje shokuese ka tronditur Italinë pasditen e së martës, ku polici i Guardia Di Finanzia, Christian Sodano ka vrarë me armë zjarri nënën e ish të dashurës dhe motrën e saj.
Krimi i rëndë ndodhi në Cisterna di Latina, pasi 27-vjeçari nuk ka pranuar ndarjen nga ish-partnerja e tij, Desyrée Amato, e cila i kishte dhënë fund lidhjes së tyre.
Viktima kanë mbetur nëna e 22-vjeçares, Nicoletta Zomparelli, 49 vjeçe dhe motra e saj Renée Amato, 19-vjeçe.
Nënë e bijë raportohet se kanë mbrojtur me trupin e tyre 22-vjeçaren, para se i riu t’i qëllonte për vdekje.
Gjatë debatit mes Desyrée dhe Christian Sodano, nënë e bijë dyshohet se kanë qëndruar përpara 22-vjeçares dhe i kanë bërtitur 27-vjeçarit që ta linte të qetë.
Në atë moment, polici ka nxjerrë pistoletën e shërbimit dhe ka qëlluar në drejtim të tyre.
Desyrée arriti që të largohej duke u mbyllur brenda në banjë. Më pas, Sodano dyshohet se ka ndjekur 22-vjeçaren dhe ka goditur me shkelma derën e tualetit.
Megjithatë, e reja arriti të arratisej nga dritarja dhe më pas u fsheh në një pyll e doli në rrugë për të kërkuar ndihmë.
Dy motrat dhe nëna e tyre ishin shumë të lidhura bashkë. Ato punonin në agjencinë e pasurive të patundshme familjare.
Christian Sodano raportohet se kishte fjetur në shtëpinë e familjes një natë para krimit të dyfishtë. Ndërsa pasditen e së nesërmes, debati i tyre ka arriti kulmin në tragjedinë që ndodhi.
