Hapja e programit të trajnimit për shërbyesit e rinj civil të Ballkanit Perëndimor 3 – 14 qershor 2024 ǀ Tiranë, Bruksel, dhe Hagë
Kolegji i Evropës organizon aktivitetin e parë zyrtar në degën e Tiranës
Kolegji i Evropës, kampusi i Bruzhës, është përzgjedhur nga Mbretëria e Vendeve të Ulëta
për të organizuar një program trajnimi dy-javor të përshtatur për nëpunës të rinj civilë, të
cilët punojnë në fushën e çështjeve të BE-së në Ballkanin Perëndimor.
Trajnimi do të zhvillohet në Tiranë, Shqipëri, nga dita e hënë, 3 qershor, deri ditën e premte,
14 qershor, dhe përfshin një udhëtim studimor në Belgjikë dhe Vendet e Ulëta. Programi do
t’u ofrojë pjesëmarrësve njohuri të thelluara dhe aftësi praktike të lidhura me politikat e BE-së dhe vendimmarrjen, me përqendrim në procesin e anëtarësimit. Sesionet ndërvepruese
do të zhvillohen nga trajnerë të mirënjohur me përvojë të provuar në institucionet e BE-së.
Secili sesion do të ofrojë hapësira të mjaftueshme për diskutime dhe shkëmbimin e
praktikave më të mira.
Nëpunësit e rinj civilë nga vendet e Ballkanit Perëndimor, të cilët punojnë në ministri dhe
agjenci të tjera shtetërore janë të inkurajuar të aplikojnë në këtë program. Kriteret e
pranimit mund të gjenden në faqen e web-it të dedikuar (këtu). Aplikimet u hapën më 29
janar dhe do të mbyllen të premten, më 1 mars 2024, në orën 23:59:59 CET. Kolegji i Evropës
do të zhvillojë përzgjedhjen e pjesëmarrësve duke u bazuar në kritere teknike, për të
siguruar përfaqësim të balancuar të profileve, kombësive dhe gjinisë. Për secilin shtet do të
përzgjidhen deri në 4 pjesëmarrës.
Pas inaugurimit të suksesshëm të kampusit në tetor 2023, në prezencën e Rektores Federica
Mogherini së bashku me Presidenten e Komisionit Evropian, Ursula von der Leyen,
Kryeministrin e Shqipërisë, Edi Rama, dhe ish-ambasadorin e Delegacionit të BE-së, Luigi
Soreca (më shumë informacion këtu), programi i trajnimit përfaqëson aktivitetin e parë të
Kolegjit të Evropës në degën e re të Tiranës, duke shënuar kështu një moment historik në
misionin e tij për të kontribuuar në projektin e integrimit evropian.