Pastruesja, Rozeta Dobi, për të cilën Prokuroria kërkon dënimin me 6 vite burg, me akuzën e vjedhjes së parave në shtëpinë e ish-zyrtares, Aldo Klosi ka dëshmuar ndër të tjera edhe për unazën, të cilën eksperti i kriminalistikës, Ervin Karamuço, pretendoi se i është vjedhur nga Dobi gjatë kohës që ajo punonte si pastruese në banesën e tij.
Karamuço tha se e kuptoi që kishte rënë pre e grabitjes në momentin që djali i Rozeta Dobit, Havier Dobi doli para gjykatës për masë sigurie dhe ky i fundit kishte veshur bluzën e djalit të tij.
“Gjatë kohës që ka dalë djali i saj, aty kemi kuptuar që është vjedhur dhe një bluzë në shtëpinë tonë. Ishte bluza e djalit dhe ai ma çoi me foto, më tha: “O ba kjo është bluza ime tha”. I thashë lëre.
E kishte veshur aty kur po merrte masën e sigurisë. I thashë lëre bluzën se do thotë “e kam blerë në dyqan” dhe nuk do t’ia dish dot. S’do t’ia dalim dot ta marrim bluzën mbrapsht. Mbylle këtë histori i thashë njëherë e mirë. Dhe nuk u morëm më.
Unë e kam kërkuar unazën diku në shtator të vitit 2022, për shkak se leva shtëpinë dhe fillojnë lëvizin këto orenditë edhe ku është unaza. Filloi edhe një debat në shtëpi: “Ku e ke unazën”. 3-4 muaj hë se do dali dhe nuk doli asnjëherë. Do bëja një status dhe do të thosha se “pastruesja që desh më ndau nga gruaja”. Ndërkohë që komisariati e kishte gjetur në banesën e saj (Rozeta Dobit). Vajta bëra një deklarim në polici që e njihja si send. Ky është imi. Kur vajta në komisariat e vura në gisht” u shpreh eksperti më shumë se një vit më parë.
Pastruesja ditën e sotme është shprehur se ajo nuk ka asnjë lidhje me unazën e Karamuços.
“Unë s’kam lidhje fare me unazën e Ervin Karamuços”, është shprehur Rozeta Dobi.
