Kombëtarja shqiptare u kthye në atdhe si e fundit në grupit B, ose ndryshe i cilësuar si “grupi i ferrit”.
“Kuqezinjtë” humbën ndeshjen e parë përballë Italisë, kampione në fuqi e Evropianit me rezultatin e ngushtë 2-1 dhe më një rekord, pasi goli i Nedim Bajramit pas vetëm 23 sekonda lojë ishte më i shpejti në historinë e këtij e kompeticioni.
Më pas erdhi një barazim dramatik 2-2 me Kroacinë, që fillimisht la një shije të mirë për mënyrë se si u arrit, por një keqardhje më pas, pasi mund të merrnim edhe më shumë.
Ndeshja e fundit ishte ajo ndaj Spanjës, që vinte me 6 pikë dhe dominim obsolut ndaj kundërshtarëve të tjerë në grup.
“Furia e kuqe” arriti të na mposhte me rezultatin 1-0, por jo të na dominonte sic ka bërë në të gjithë historinë me ne, apo vitet e fundit me të gjithë kundërshtarët që ka pasur përballë.
“Kuqezinjtë” patën rastet e tyre të paktën për të barazuar, por portieri Raya u tregua në lartësinë e duhur.
Prestigjozja “Reuters” në artikullin e saj, i përmend të gjitha këto, duke mos harruar edhe tifozerinë, e cila ishte e shumtë në numër dhe model për mënyrën se si u soll brenda dhe jashtë fushe.
Shkrimi i Reuters:
Shqipëria kthehet në shtëpi si skuadra e fundit e grupit të tyre në Euro 2024 me vetëm një pikë, por këto fakte nuk tregojnë asgjë për kontributin e saj të shkëlqyeshëm në turne në betejat pasionante kundër tre prej skuadrave kryesore të turneut.
Me Shqipërinë në Gjermani, përballë kampionëve në fuqi, Italisë në ndeshjen e tyre hapëse, trajneri brazilian Sylvinho nuk mund ta imagjinonte kurrë në ëndrrat e tij më të çmendura se sa mirë do të fillonte turneu i dytë Europian në histori për “kuqezinjtë”.
Nga nisja e ndeshjes, Shqipëria bëri tre pasime, Italia gaboi nga rivënia dhe Nedim Bajrami u hodh për të goditur topin, duke shënuar pas vetëm 23 sekondave lojë dhe duke realizuar golin më të shpejtë në historinë e EURO.
Një gol që ndezi festën në mesin e dhjetëra mijëra tifozëve të veshur “kuqezi” në Dortmund, kaos në baret dhe shtëpitë e kryeqytetit shqiptar, Tiranë dhe një moment i pavdekshëm për kombin krenar ballkanik.
Italia më pas shënoi dy gola, por Shqipëria i mbajti nën presion deri në fund, për pak sa nuk barazoi në shtesë, duke sjellë duartrokitje në stadium dhe duke habitur mbarë botën për një ekip që askush nuk kishte shpresë se mund të bënte diçka në grupin ku ndodhej.
Kundër Kroacisë në ndeshjen e radhës të Grupit B, Shqipëria i emocionoi sërish tifozët e saj pasi sfidoi dhe barazoi 2-2 me një gol në sekondat e fundit, në një nga ndeshjet më pulsuese të turneut deri më tani.
Shqiptarët u shfaqën më të përmbajtur në ndeshjen e tyre të tretë, në një humbje të ngushtë 1-0 ndaj Spanjës, por gjithsesi i dhanë kundërshtarëve të tyre shumë momente të pakëndshme nëpërmjet Jasir Asanit dhe Kristjan Asllanit.
KRENARË
“Në përgjithësi do ta konsideroja një paraqitje pozitive në këtë turne”, tha kapiteni i Shqipërisë, Berat Djimsiti.
“Gjithçka është e mundur në futboll dhe, me pak fat, ne mund të kishim bërë më shumë” shtoi ai.
Tekniku Sylvinho, i cili në Tiranë zgjodhi të vinte me dy ndihmësit e tij, brazilianin Doriva dhe argjentinasin Pablo Zabaleta, nuk ishte e penduar për këtë eksperiencë.
Ai mes emocioneve tha se ekipi i tij i ri dhe pa përvojë ishte përmirësuar gjatë një viti i gjysmë dhe se ishte krenarë për atë që skuadra tregoi në grupin e “Ferrit”.
Federata futbollit e Shqipërisë shpreson që përvoja në Gjermani t’i ndihmojë për të ardhmen, me paraqitje më të rregullta.
Një gjë për të cilën mund të jenë të sigurt shqiptarët është mbështetja e jashtëzakonshme.
Shumë ishin të befasuar kur panë shqiptarët në numër më të madh se italianët në ndeshjen hapëse, dhe kjo vazhdoi gjatë gjithë kohës, zhurma dhe ngjyra e tifozëve “kuqezi” përputheshin me numrin e madh të tyre. Disa erdhën nga shtëpia e disa të tjerë nga diaspora globale shqiptare.
