Pas temperaturave shumë të larta, vendi ynë dy ditët e fundit është përfshirë nga reshje të shiut.
Lajda Porja tha se dita e premte parashikohet me vranësirat dhe reshjet, kurse fundjava do të sjellë përmirësim të motit. Sipas meteorologes, i “nxehti afrikan” do të “mbërthejë” sërish Shqipërinë pas datës 5 korrik.
“Kemi patur temperatura minimale dhe lagështira shumë e lartë në shumë qytete, sidomos Tirana. Reshjet janë tipike, zakonisht janë rrebeshe me intensitet të lartë. Pas çdo periudhe të nxehtë janë të pritshëm reshje të tilla. Mund të theksoj se gjithashtu do të kemi edhe në korrik reshje, pasi pas një faze me temperatura të larta, do të kemi herë pas here reshje. Një “valë afrikane” do të godasë sërish, dhe do të preket edhe vendi ynë, pas datës 5 korrik. Ndërsa ditët e fundit të qershorit do të mbyllen me përmirësim të motit”, tha Porja.
