Izraeli njoftoi se kishte bombarduar objektivat e grupeve Houthi në Jemen këtë të diel, duke zgjeruar konfrontimin e tij me aleatët e Iranit në rajon, dy ditë pasi vrau liderin e Hezbollahut, Sayyed Hassan Nasrallah në Liban. Sulmet ajrore shënjestruan portin Hodeidah të Jemenit si përgjigje e goditjeve me raketa që Houthi ka bërë ndaj Izraelit ditët e fundit. Ky zhvillim ka shtuar frikën se luftimet në Lindjen e Mesme mund të dalin jashtë kontrollit dhe të tërheqin në konflikt Iranin dhe aleatin kryesor të Izraelit, Shtetet e Bashkuara të Amerikës.
Ministria e shëndetësisë e drejtuar nga Houthi tha se të paktën 4 persona u vranë dhe 29 u plagosën nga sulmet izraelite. Sulmet ndodhën teksa Izraeli goditi më shumë objektiva në Liban, ku bombardimet e intensifikuara prej dy javësh kanë vrarë një varg liderësh të lartë të Hezbollahut dhe kanë dëbuar qindra mijëra njerëz nga shtëpitë e tyre. Izraeli u zotua këtë të diel të vazhdojë sulmin e tij.
“Ka humbur kokën dhe ne duhet të vazhdojmë të godasim fort Hezbollahun” – tha shefi i shtabit ushtarak të Izraelit, Herzi Halevi. Ministria e Shëndetësisë e Libanit tha se vetëm të dielën, sulmet izraelite kishin vrarë 32 njerëz në Ain Deleb në jug, 21 njerëz në Baalbek-Hermel në lindje dhe se 14 mjekë ishin vrarë në sulmet ajrore gjatë dy ditëve të fundit.
Dronët izraelitë fluturuan mbi Bejrut gjatë natës dhe për pjesën më të madhe të së dielës shpërthimet e forta të sulmeve të reja ajrore jehuan rreth kryeqytetit libanez. Hezbollahu dhe Izraeli kishin shkëmbyer raketa nga përtej kufirit që nga fillimi i luftës në Gaza, e cila u shkaktua nga sulmi i 7 tetorit nga militantët e Hamasit.
Huthët e Jemenit kishin nisur sulme sporadike ndaj Izraelit gjatë gjithë asaj kohe, madje duke ndërprerë transportin në Detin e Kuq. Izraeli i shtoi me shpejtësi sulmet e tij ndaj Hezbollahut dy javë më parë me qëllim për t’i bërë zonat veriore të sigurta për banorët që të kthehen në shtëpitë e tyre, duke vrarë shumë nga lidershipi i grupit. Ministri i mbrojtjes i Izraelit tha se tani po diskutohet për zgjerimin e ofensivës.
Vdekja e Nasrallah i dha një goditje veçanërisht të rëndësishme grupit të cilin ai e drejtoi për 32 vjet. Irani tha se vdekja e tij do të shpagohej. Shtetet e Bashkuara kanë kërkuar një zgjidhje diplomatike të konfliktit në Liban, por gjithashtu kanë autorizuar ushtrinë e tyre të përforcohet në rajon në shenjë të shqetësimit në rritje.
Presidenti i SHBA, Joe Biden, i pyetur nëse mund të shmanget një luftë e gjithanshme në Lindjen e Mesme, tha: “Duhet të ndodhë”. Ai tha se do të bisedojë me presidentin izraelit Benjamin Netanyahu, por nuk dha më shumë detaje. Senatori amerikan Mark Kelly, i cili drejton një nënkomision të Shërbimeve të Armatosura të Senatit, tha se bomba që Izraeli përdori për të vrarë Nasrallah ishte një armë e drejtuar 900 kg e prodhuar nga SHBA.
Në Iran, i cili ndihmoi në krijimin e Hezbollahut në fillim të viteve 1980, figura të larta vajtuan vdekjen e një anëtari të lartë të Gardës Revolucionare të vrarë së bashku me Nasrallah dhe Teherani bëri thirrje për një takim të Këshillit të Sigurimit të OKB-së mbi veprimet e Izraelit. Udhëheqësi suprem iranian Ayatollah Ali Khamenei u zhvendos në një vend të sigurt në Iran pas vrasjes së Nasrallah, thanë burimet për Reuters.
