Prokuroria e Posaçme kundër Korrupsionit dhe Krimit të Organizuar, SPAK, i ka dërguar fletëthirrje deputetit socialist, Plarent Ndreca për ta marrë të pandehur për shkelje të barazisë në tendera.
Burimet bëjnë të ditur se prokuroria antikorrupsion mbylli hetimet për tenderin e rikonstruksionit të katër komisariateve, kur Ndreca mbante postin e Sekretarit të Përgjithshëm të Ministrisë së Brendshme.
Bëhet fjalë për një tender që kishte për objekt rikonstruksionin e Drejtorisë Vendore e të Policisë Vlorë, Komisariatit Nr.4 në Tiranë, Komisariatin e Pogradecit dhe atë të Mirditës.
Nga procesi i auditimit, Kontrolli i Lartë i Shtetit gjeti mospërputhje dhe devijime ligjore në procedurat e prokurimit publik.
Po ashtu sipas KLSH u rrit në mënyrë të paargumentueshme vlera e kostos së ndërtimeve.
Ka qenë pikërisht ky institucion auditues që shkeljet i depozitoi në Prokurorinë e Posaçme Kundër Korrupsionit dhe Krimit të Organizuar.
Megjithatë, SPAK ende nuk e ka njoftuar zyrtarisht akuzën, ndërsa pritet në ditët në vijim që avokati i ligjvënësit t’i drejtohet strukturës antikorrupsion./
