Kuvendi i Shqipërisë miratoi në parim mbrëmjen e sotme (19 nëntor) projekt buxhetin për vitin 2025.
Pas një seance maratonë e cila u zhvillua për dy ditë në Kuvend, ku pati mjaft debate dhe diskutime nga opozita dhe mazhoranca, Kuvendi miratoi sot me 75 vota pro buxhetin 2025.
Në momentin e miratimit të buxhetit në Kuvend ndodheshin në total 116 deputetë.
Projektligji për buxhetin e vitit 2025, i cili kërkon shumicë të thjeshtë votash, u miratua me 75 vota pro të mazhorancës, 40 vota kundër të opozitës dhe 0 abstenim.
Ndërkohë që deputetët e pranishëm që nuk votuan ishin 22.
Seanca maratonë që u mbajt prej dy ditësh në Kuvendin e Shqipërisë u zhvillua me tensione dhe debate mes mazhorancës dhe opozitës.
Deputetët e opozitës kundërshtuan buxhetin e 2025, duke thënë se ai nuk reflekton nevojat reale të qytetarëve.
Sot në orën 17:00 paralelisht me seancën maratonë, jashtë Kuvendit u mbajt tubimi i opozitës në kuadër të mosbindjes civile. Në tubim sot morën pjesë përkrahës pensionistë të opozitës, të cilët kërkuan pensione më të larta dhe jo bonuse që i cilësuan si lëmoshë.
BUXHETI 2025
Vijimi i konsolidimit fiskal me qëllim uljen e borxhit publik është prioritet i qeverisë në librin e financave për 2025-ën. Nga Konferenca e Kryetarëve e mbajtur javën e kaluar, ku prezantoi projektbuxhetin për vitin e ardhshëm, ministri i Financave, Petrit Malaj tha se pritshmëritë e qeverisë janë për uljen e deficitit dhe rritjen ekonomike. “Për 2025 buxheti do të bazohet në objektivat e politikës fiskale duke ulur defiçitin dhe të ruajë bilancin për të ulur borxhin dhe sipas pritshmërive tona do të jetë nën nivelin 56% të GDP. Parashikojmë një rritje ekonomike me 3.5% me një konvergjencë në 3.9%”.
Qeveria ka planifikuar 822 miliardë Lekë në buxhet, ndërkohë që flet për tregues pozitiv në rritje për të ardhurat, që sipas kreut të financave parashikohen me rreth 40.6 miliardë Lekë më shumë. “Projektbuxheti tejkalon shifrën e 8 miliardë Eurove të planifikuara”. Malaj foli për risqe të balancuara dhe një perspektivë inkurajuese afatmesme të financave shqiptare, bazuar në vlerësimet e fundit të bëra në raportet e agjencisë së vlerësimit të kreditit “Standard and Poors dhe Moody’s.
Të ardhurat kapin vlerën e 754 miliardë Lekëve, ndërkohë që projeksionet sipas ministrit Malaj flasin për parashikime edhe më pozitive, për shkak të parave që qeveria synon të mbledhë nga tatimet dhe kontributet e sigurimeve shoqërore.
Krahasuar me buxhetin aktual, qeveria ka vendosur të ndajë më shumë para edhe për investimet infrastrukturore, të cilësuara me rëndësi strategjike. Libri i financave nuk parashikon rritje të pensioneve por vetëm indeksim të tyre në vlerën e 1.6 miliardë Lekëve, ndërkohë që do mbështesë rritjen e pagave. Pas prezantimit të draftit në Konferencën e Kryetarëve, i hapet rruga diskutimeve në komisionet parlamentare.
