Edmond Veseli, 56 vjeç, banor i lagjes nr. 2 në qytetin e Krujës është zhdukur prej 6 ditësh dhe familja e tij kërkon ndihmë për ta gjetur.
Sipas familjarëve, Edmondi, i njohur ndryshe si “Edi i Derexhikut” (pasi shet tek Pazari i Vjetër), është parë për herë të fundit më 30 nëntor, rreth orës 14:30, pranë gjimnazit të Krujës.
Pas zhdukjes, familja bëri denoncim në Policinë e Krujës 24 orë më vonë, por deri më tani nuk ka asnjë rezultat në lidhje me gjetjen e tij.
Vëllai i tij, Altini, akuzon policinë për mungesë veprimi, duke thënë se nuk është kryer asnjë kërkim nga ana e efektivëve dhe as patrullat, dhe se nuk kanë me vete një fotografi identifikuese të Edmondit.
Altini bën apel për ndihmë nga qytetarët që mund të kenë parë ose të kenë informacione rreth vendndodhjes së tij. Familja thekson se Edmondi nuk vuan nga probleme të shëndetit mendor dhe nuk ka konflikte me asnjë person, çka e bën të paqartë arsyen e zhdukjes. Telefoni i tij është i fikur që nga e shtuna, dita kur humbi kontaktet.
Në momentin e zhdukjes, Edmondi kishte veshur një xhup ngjyrë blu dhe pantallona ngjyrë bezhë.
Familja lutet për çdo informacion të mundshëm dhe ka vënë në dispozicion numrin e vëllait të tij, Altinit: 068 322 1670.
