Sekretari i Shtetit amerikan, Marco Rubio, njoftoi të hënën se ka marrë rolin e drejtorit të përkohshëm të Agjencisë për Zhvillim Ndërkombëtar të SHBA (USAID), pas deklaratave të Elon Musk, njeriut më të pasur në botë dhe përgjegjës për reformimin e qeverisë federale, se Presidenti Donald Trump kishte miratuar mbylljen e kësaj agjencie.
Në Uashington, selia e USAID u mbyll gjatë ditës, dhe punonjësve iu dërgua një email që t’ë qëndronin në shtëpi.
Logot dhe fotot e agjencisë u hoqën nga muret e ndërtesës, ndërsa faqja e internetit dhe llogaritë në rrjetet sociale u zhdukën.
“Po ndodh apokalipsi në USAID,” tha një punonjës i agjencisë.
USAID, agjencia e ndihmës ndërkombëtare e krijuar nga Kongresi si një organ i pavarur, ka qenë në shënjestër të përpjekjeve të Trump dhe Musk për të reformuar qeverinë federale. Trump dhe aleatët e tij kanë deklaruar se agjencia është tejet partiake, ndërsa demokratët kanë hedhur poshtë këtë pretendim dhe thonë se Trump nuk ka autoritet për të shkatërruar agjencinë.
Për shumë muaj, ligjvënësit dhe punonjësit e ndihmës kanë pritur që Trump ta mbyllë agjencinë dhe ta vendosë atë nën ombrellën e Departamentit të Shtetit, një hap që duket se do të ndodhte shumë shpejt pas komenteve të Musk gjatë një diskutimi në X, platformën sociale që ai zotëron.
“Mbi çështjen e USAID-it, e kam diskutuar me (presidentin) në detaje dhe ai ra dakord që duhet ta mbyllim,” tha Musk gjatë një bisede në X të hënën herët.
Punonjësit e USAID-it morën një email pas mesnate për t’u njoftuar se nuk duhet të shkonin në zyrat e agjencisë në Uashington. Ata u urdhëruan të punonin nga distanca, përveç disa punonjësve që kishin detyra të nevojshme në terren.
Punonjësit e USAID-it, shumica e të cilëve janë punonjës me karrierë në administratën shtetërore, u shqetësuan se mund të humbnin aksesin në sistemet e agjencisë dhe do të mbeteshin pa informacione të mjaftueshme.
Kjo situatë ka shkaktuar një kaos të papritur, duke i lënë punonjësit në pasiguri të plotë për të ardhmen e punës së tyre. Për më tepër, disa kontraktorë që ishin në misione zyrtare në vende të rrezikshme nuk kishin asnjë informacion se si do të ktheheshin në shtëpi.
Sidoqoftë, disa punonjës të USAID-it janë shprehur të vendosur për të vazhduar punën e tyre, pavarësisht pasigurisë dhe trazirave që po përjetojnë. Ata shpresojnë që të mbrojnë misionin e agjencisë dhe të vazhdojnë me punën humanitare që ka shpëtuar shumë jetë në mbarë botën.
Ndërkohë, ligjvënësit demokratë janë kundër përpjekjeve të Trump për të shkatërruar USAID dhe theksojnë se është detyrë e Kongresit, jo e ekzekutivit, të krijojë apo të shkatërrojë agjenci të tilla.
