Xheni Vargu është shoqja e 22-vjeçares, Euxhena Jorgji, e cila ndërroi jetë si pasojë e Covid-19. Ajo ishte sot në studion e “Shqipëria Live” për të kujtuar shoqen e saj të ndjerë.
Xheni tregon se sa pozitive ishte Euxhena dhe sa shumë e donte jetën. Ajo shton se shoqja kishte shumë ëndrra për jetën.
“Lajmi na erdhi i vështirë. Ne ishim në kontakt gjatë gjithë kohës, edhe kur ishte në spital. Pyesnin se si ishte. Në fillim na tha se ishte e vështirë dhe nuk do ja dilte, por më vonë u kthye më pozitive dhe kishte shumë ëndrra për jetën.
Ishte një tip shumë pozitiv, edhe kur nuk kishte mundësi, ajo i krijonte mundësitë. Gjatë gjithë kohës e donte jetën, e donte punën. Ne u njohëm para 3-vitesh në një organizatë vullnetare, ku ishim në të njëjtin grup. Çdo njeri që e ka njohur do thoshte të njëjtat fjalë për të”, tregoi ajo.
