Një 88-vjeçare nga fshati Mborje i Korçës është ankuar pranë emisionit Stop në Tv Klan për një vendim të padrejtë gjyqësor.
Zonja Nasta Tore kishte nënshkruar një marrëveshje noteriale me një banore të fshatit Mborje, ku palët binin dakord se gruaja do t’i shërbente dhe pas vdekjes, 88-vjeçare do t’i linte shtëpinë në pronësi në këmbim të kujdesit të treguar.
Por e motra e Nastës, Donika, tregon se kur banorja Kozeta Kala u fut në shtëpi si kujdestare bashkë me fëmijët e saj, nuk e trajtuan mirë 88-vjeçaren, duke e lënë pa kujdes e pa ushqim, derisa e moshuara u detyrua të largohej nga shtëpia. Ajo donte që të zgjidhte kontratën për mospërmbushje të kushteve siç ishte rënë dakord, por kujdestarja nuk pranoi.
Në këto kushte iu drejtua gjykatës me gjyqtare Ariola Kristo për të zgjidhur kontratën. Gjyqtarja jo vetëm që e rrëzoi kërkesë-padinë duke i dhënë të drejtë kujdestares Kozeta Kala, por nuk ka zbardhur as vendimin prej më shumë se një muaji, kur duhet ta bënte brenda 20 ditësh.
“Unë jam Donika, jam motra e Nastës. Ne si plakë që e kishim 88 vjeç, vendosëm që t’i vendosnim një njeri për shërbim. Vendosëm Kozeta Kalon, një grua që jetonte në Mborje, edhe do t’i përgjigje motrës për ushqim, strehim edhe veshmbathje. Edhe shkuam te noteri. Te noteri bëmë një kontratë. Në këmbim ajo do merrte shtëpinë e motrës tonë. Pasi u bë kjo kontratë pastaj, Kozeta hyri në shtëpi të motrës tonë, ajo filloi të mos kujdesej më as për ushqim, as për veshmbathje, edhe për strehim. E torturonte shumë. Nga torturat që i bënte që e linte pa ngrënë, edhe për veshmbathje, nuk ju përgjigj, edhe motra iku. Pasi iku motra nga shtëpia, Kozeta nuk pranoi që të prishej kontrata që kishin lidhur të dyja. Ju drejtuam gjykatës me gjyqtare Ariola Kristo, zhvilluam goxha seanca, edhe në përfundim gjyqtarja Ariola Kristo na thotë që shtëpia nuk i takon Nasta Tores, ia dha Kozetës. Gjyqi ka mbaruar në 22 Prill, vendimin na thanë pas 20 ditëve do vij ta kërkoj Nasta Tore. Kjo shkonte, gjer më sot vendimi nuk është zbardhur. Po bëjmë 1 muaj e 4 ditë. Zonja është kthyer në shtëpinë e saj, pas 1 muaji policia nxorri atë gruan që do t’i shërbente dhe u kthye motra ime. Kërkojmë që të na zgjidhet ajo kontrata dhe të na zbardhet vendimi i gjyqit që s’po na i japin”, thotë motra e 88-vjeçares Nasta Tore.
Motra e 88-vjeçares ka shkuar në Gjykatën e Korçës për të pyetur lidhur me vendimin e gjykatës që nuk është zbardhur ende. Sekretarja e gjykatës i thotë se duhet të paraqiten herë pas herë nga fshati Mborje në Korçë!
Sekretarja: Hajdeni herë pas here, që ta shikoni dhe ta firmosni, por ai vendim është rrëzuar dhe plaka ka të drejtë të bëjë ankim.
Denoncuesja: Gjyqi ka mbaruar në 22 Prill.
Sekretarja: Po, të drejtë ke! Unë vajta i thashë gjyqtares, “Kam padi shumë, s’kam qenë në punë, do ta bëj. Do ta sqarosh palën kshu, -tha. E drejta e ankimimit nuk i ka ikur. I ikën në momentin, që do verë vendimi në shtëpi. Unë kam shkuar përditë tek gjyqtarja për këtë arsye.
Gazetarja e emisionit Stop, Viola Lito shkoi në ambientet e Gjykatës së Korçës dhe kërkoi takim me gjyqtaren e çështjes për ta pyetur përse nuk ka zbardhur vendimin e arsyetuar, sikurse e përcakton legjislacioni. Por, Kancelarja e Gjykatës së Korçës i tha gazetares së Stop se gjyqtarja Ariola Kristo nuk pranon që të takojë gazetarë dhe qytetarë.
Gazetarja: Dua të komunikoj unë me të!
Kancelarja: Kush jeni ju?
Gazetarja: Viola Lito, gazetare e emisionit Stop, në Tv Klan.
Kancelarja: Gjyqtarja e çështjes Ariola Kristo, nuk ka takim me asnjë. Kaq! Shkurt!
Gazetarja: Po mirë mua që nuk më pret, po qytetarët pse nuk i pret?
Kancelarja: Nuk e ka zyrë pritje gjyqtarja.
Gazetarja: Qytetares, së cilës nuk i ka zbardhur vendimin!
Kancelarja: Ka të drejtën e saj ajo!
Gazetarja: Ka të drejtën të zbardhi vendimin brenda 20 ditësh, pastaj ka të drejtën e saj të mos t’i presi.
Kancelarja: Sigurisht ajo nuk e ka..
Gazetarja: Nuk e ka sallë pritje? Po si gjyqtare duhet ta zbardhi vendimin?
Kancelarja:Po e ka të drejtën e saj.
Gazetarja: Po pse s’ia ka zbardh pra? Nuk e paska për detyrë atë. Këtë e ka për detyrë ta bëjë?
Kancelarja: Nuk pres asnjë me zonjë,-tha. As popull, as gazetarë, asnjë. Është e drejtë e saj.
/tvklan.al
