Botuesi dhe gazetari Henri Çili thotë se kryeministri Edi Rama e ka mbyllur ciklin e tij në krye të qeverisë dhe se duhet ta ndërpresë mandatin, pasi sipas tij, do t’i bënte nder sistemit.
Ai thotë se ndryshe nga mandati i parë ku u vunë re disa prirje reformiste, që pas grevës së studentëve, kryeministri i është kthyer populizmit.
Çili: Rama në krye të herët e ka nisur qartësisht si populist. Madje mund të thuhet se shenja ose fenomene të trampizmit, ai i ka manifestuar me kohë, që nga fillimi dhe shprehja e tij e famshme nuk jam politikan. Mendoj se kur u bë kryeministër pati një tentacion për të bërë gjëra reformiste dhe ndoshta u indikua ndoshta nga këshilltarët e tij që ka pasur në krah.
Nuk është pak të kesh këshilltar politik si Tony Blair. Pati një fazë jo populizmi. Po bënte gjëra antipopullore. Të burgosësh 40 e ca mi veta për faturat e energjisë është antipopullore. Disa gjëra të tjera si reforma e pensioneve, arsimit, kontrollit të territorit, pati një fazë reformiste. Por nga vjeshta e këtij viti, Rama i është dorëzuar dhe ka përfunduar ciklin e tij si reformist, dhe i është dorëzuar populizmit, i cili në Evropën jugore ka tipare puniste.
Kush mund ta përkufizojë sot se çfarë bën Rama? As ai vet nuk besoj se ai lodhet sot për këtë. Pas grevës së studentëve dhe këtej i është futur një projekti menaxhimi, populizmash, kërkesash, por nuk ka një ide thelbësore me të cilin mund ta qeverisë vendin. Sot për sot, tiparet e tij janë të tilla që ai e ka mbyllur arsyen se pse duhet të rri në pushtet. Për hir të sistemit duhet ta lërë përgjysmë edhe këtë mandat dhe t’i japë vendit një kontribut të madh. Një sistem të ri politiko-zgjedhor shumë garantist. Nuk mund të vazhdojmë kështu.
Kemi që nga viti 1995 kemi problemin e rregullsisë së zgjedhjeve. Nga ana tjetër, Rama duhet të ruaj dypartizmin. Do të bënte një gabim të madh kundër interesit publikë, të partisë së vet. Po them dy teza të tmerrshme. Dy partitizmi është një nga kushtet e ekzistencës së politikës shqiptare. Sado defekte të kenë PD dhe PS, ato janë dy parti të mëdha, të përgjegjshme dhe janë vlerë. Pa bipartizmin mendoni sikur në Shqipëri të kishin 7-8 parti dhe të bëheshin lëmsh.
-Çfarë ndodh nëse më 30 qershor shkon vetëm një parti në zgjedhje?
Çili: Katastrofë sigurisht!”
Në një intervistë për “Politiko”, Çili thekson problemi thelbësor në politikën shqiptare është mënyra se si financohen partitë politike.
“Jeta jonë politike ka një sëmundje “mëmë”, mënyra se si financohet jeta politike dhe si paguhen politikanët. Metafora është e thjeshtë. Politika kërkon X lekë, ndërkohë që buxheti i shtetit jep një të katërtën e këtyre nevojave. Atëherë ku do gjenden paratë? Kjo në fillim nisi me angazhimin e njerëzve me premtim për punësim, iku administrata. Nisi me financim nën dorë të biznesmenëve me pretendimin e një tenderi. Iku gara e ndershme e tenderave publikë. Pastaj nisi me paratë nga informalja. Kostot u shtuan. Nisi dhe me para nga informalja. Erdhi një moment kur bota e krimit doli hapur, donte pjesëmarrje të hapur.
I ndeshur në të dyja partitë por i shndërruar totalisht në fenomen gjatë qeverisjes së Rilindjes. Ndoshta ka qenë e vetmja rrugë. Ka pasur edhe një slogan Rama. Bile ka biseda informale që rrugaçëve në rrugë, do t’u përgjigjemi me rrugaçëve të qeverisë. Kjo i ka sjellë jashtëzakonisht dëm jetës politike. Dekriminalizimi është një nga fitoret e mëdha të Lulzim Bashës, sepse ky fenomen nuk mund të përsëritet më. Nuk e qortoj marrëveshjen e 17 majit. Marrëveshja e 17 majit është pozitive për Shqipërinë por zbatimi i dha shumë kosto Lulzim Bashës dhe e ktheu jetën politike mbrapsht. Të gjitha këto përfunduan; kjo nuk ecet më dhe kemi nevojë për një ristart”, u shpreh ai.
