Bashkëshorti i Migena Sinanit, Erjon Sinani ka rrëfyer momentin kur mori vesh lajmin tragjik se i vëllai, Ronaldi i kishte ekzekutuar bashkëshorten e më pas kishte vrarë veten.
Ai tha se prindërit i kishin dërguar mesazhe dhe në momentin që i mori në telefon i thanë “hataja e madhe ka ndodhur, janë vra dy vetë në shtëpinë tonë”.
Erjon Sinani, i cili po punonte si taksist kur ndodhi tragjedia, tregoi se kur shkoi në shtëpi gjeti të vëllanë të shtrirë në tokë, pa shenja jete. Ai tha se 44-vjeçari ka shfaqur shenja depresioni më parë, por kohët e fundit gjendja e tij ka qenë mirë.
“Kam 5 vite i martuar kemi dy fëmijë, djalin 4 vjeç dhe goca afër dy vjeç si ka mbushur akoma. Nuk ndodhesha në shtëpi, isha në punë dhe më erdhi një mesazh nga prindërit, i kishin rënë telefonit, por nuk punonin linjat, kur mora mesazhin i mora në telefon dhe më thanë se hataja e madhe kishte ndodhur, janë vra dy vetë në shtëpinë tonë, ç’të shihja, policia, gjak, vëllain të shtrirë në tokë. Gjendja e tij ka qenë normale, ka qenë dikur në depresion, por kohët e fundit ka qenë mirë”, tha ai për ABC News.
Ronald Sinani hyri në dhomën e kunatës së tij, Migenës dhe teksa ajo po flinte gjumë me vajzën 2-vjeçe në krevat, ai e qëlloi për vdekje me plumb në gjoks.
Më pas doli në oborrin e banesës dhe vrau veten. Kanë qenë prindërit e tij që kanë dëgjuar krismat e armës dhe kur janë ngritur u përballën me skenën e tmerrshme.
