Tifozët e ndeshjes Belgjikë – Suedi u larguan nga stadiumi i Bruskelit dy orë e gjysmë pas vrasjes së dy suedezëve në një sulm aty pranë nga një person i armatosur që u vra paraditën e sotme (17 tetor) nga policia belge.
Tifozët suedezë ishin të fundit që u larguan nga stadiumi King Baudouin, ku rreth 35,000 tifozë të dy skuadrave ishin mbledhur për të ndjekur ndeshjen për kualifikueset e Euro 2024.
Manu Leroy, CEO i shoqatës belge të futbollit, tha se policia kishte shoqëruar tifozët dhe lojtarët suedezë që “të shkonin direkt në aeroport dhe të largoheshin”, për shkak të rrezikut që u kanosej.
Hetuesit e ngjarjes thonë se kombësia suedeze e viktimave ishte një “motiv i mundshëm” i sulmuesit, sipas pretendimit të tij në video.
Zona përreth stadiumit, e vendosur rreth pesë kilometra nga skena e sulmit.
Fillimisht u vendos që ndeshja të vazhdojë sepse stadiumi ishte vendi më i sigurt për tifozët, por në pjesën e parë ndeshja u ndërpre me rezultatin 1-1 dhe nuk u rifillua.
UEFA tha se vendimi për të ndërprerë lojën u mor pas konsultimit me të dyja skuadrat dhe autoritetet belge.
“Jam tmerrësisht i trishtuar. Ne ramë dakord 100% që të mos luajmë pjesën e dytë për shkak të kushteve dhe për respekt për viktimat dhe familjet e tyre,” tha trajneri suedez Janne Andersson.
Të mbajtur brenda stadiumit si masë sigurie, tifozët përballuan të ftohtin dhe ankthin duke kënduar këngë për nder të Suedisë dhe duke brohoritur “Të gjithë bashkë, të gjithë bashkë!”.
Duartrokitjet shënuan edhe pritjen e gjatë. Më në fund, pak para mesnatës, tifozët e Djajve të Kuq filluan të largoheshin nga stadiumi, pasi autoritetet kishin zgjedhur të evakuonin tifozët belgë që ishin në pritje për të shmangur turmat.
