Alted Jolldashi është 27-vjeçari që u plagos pasditen e sotme (1 mars) në Pogradec. Burime bëjnë me dije se ndaj tij është qëlluar 4 herë, por e kanë kapur vetëm dy plumba, një në shpatull dhe një në këmbë.
Plagosja e tij ndodhi pas një konflikti çasti, dhe tashmë ndodhet në spital, jashtë rrezikut për jetën.
Autori i dyshuar është Deis Meko dhe për kapjen e tij, policia ka ngritur pika kontrolli në hyrje-daljet e qytetit.
Njoftimi:
Pogradec/Informacion paraprak
Më datë 01.03.2024, rreth orës 16:30, në vendin e quajtur “Kryqëzimi i Tushemishtit”, gjatë një konflikti të çastit, dyshohet se ka mbetur i plagosur me armë zjarri shtetasi A. J., rreth 27 vjeç, banues në fshatin Buçimas, Pogradec, i cili u dërgua në spitalin e Pogradecit për ndihmë mjekësore, ku ndodhet jashtë rrezikut për jetën.
Shërbimet e Policisë menjëherë kanë shkuar në vendngjarje dhe kanë bërë të mundur identifikimin e autorit të dyshuar të ngjarjes shtetasit D. M., 26 vjeç. Janë ngritur pika kontrolli në hyrje-daljet e qytetit, me qëllim kapjen dhe vënien para përgjegjësisë të autorit të dyshuar.
Grupi hetimor në drejtimin e Prokurorisë po punon për zbardhjen e plotë të rrethanave të kësaj ngjarjeje.
