Të paktën 20 persona janë vrarë dhe më shumë se 450 janë plagosur nga një valë e dytë shpërthimesh të pajisjeve të komunikimit në Liban, deklaroi ministria e Shëndetësisë e vendit.
Pager-at e përdorura nga grupi i Hezbollah shpërthyen në periferitë jugore të kryeqytetit Bejrut, Luginën Bekaa dhe Libanin jugor, zona që shihen si bastionet e tij.
Disa nga shpërthimet ndodhën gjatë funeralit të 12 viktimave që u vranë nga shpërthimi i para. Hezbollahu fajësoi Izraelin për sulmin.
Shpërthimet erdhën pasi Ministri i Mbrojtjes i Izraelit, Yoav Gallant njoftoi një “fazë të re në luftë” dhe pasi një divizion i ushtrisë izraelite u zhvendos në veri.
Sekretari i Përgjithshëm i OKB-së, António Guterres paralajmëroi për “rrezikun serioz të një përshkallëzimi dramatik” dhe u bëri thirrje të gjitha palëve “të ushtrojnë përmbajtje maksimale”.
“Natyrisht, logjika për të bërë të gjitha këto pajisje të shpërthejnë është ta bësh atë si një sulm parandalues përpara një operacioni të madh ushtarak,” u tha ai gazetarëve.
Kishte frikë në rritje për një konflikt të gjithanshëm pas 11 muajsh luftimesh ndërkufitare të shkaktuara nga lufta midis Izraelit dhe Hamasit në Gaza.
Disa orë pas shpërthimeve të së mërkurës, kryeministri izraelit Benjamin Netanyahu u zotua të kthejë dhjetëra mijëra njerëz të zhvendosur nga veriu i vendit “të sigurtë në shtëpitë e tyre”.
