Një ngjarje tronditëse ndodhi më 25 tetor në Itali, ku një 13-vjeçare shqiptare humbi jetën tragjikisht, pasi ra nga kati i 7-të i banesës së saj.
Autoritetet italiane tashmë kanë nisur hetimin në gjendje të lirë për të dashurin e saj 15-vjeçar, i cili siç përshkruhet nga familjarët e të miturës ka qenë shumë xheloz.
Autopsia e trupit të 13-vjeçares që ndërroi jetë të premten u krye pasditen e sotme në Pavia nga mjeku ligjor Giovanni Cecchetto.
“Rezultati do të jetë vendimtar për rindërtimin e dinamikës. Bashkë me dëshmitë e mbledhura dhe konstatimet e bëra nga karabinierët, do të mund të rindërtojmë dinamikën e kësaj ngjarje shumë të trishtë”, tha avokatja Lorenza Dordoni, e cila asiston nënën e trembëdhjetë vjeçares.
Familja e 13-vjeçares do të paraqesë një deklaratë me elementë të rinj në Prokurorinë e të Miturve. Po ashtu do të prezantohen dokumente, komunikime të vajzës që tregojnë sjelljen obsesive të dashurit 15-vjeçar.
Familja e vajzës nuk e ka besuar asnjëherë se 13-vjeçarja është vetëvrarë , siç pretendonte i dashuri dhe është e bindur se është një vrasje.
“Ai ishte obsesiv dhe xheloz” tha nëna e vajzës.
Ndërkohë gjatë marrjes në pyetje i dashuri 15-vjeçar i vajzës foli për një “gjest vullnetar” nga ana e 13-vjeçares. Sipas pistave të para të mbledhura nga hetuesit, vajza, me origjinë shqiptare, ka shprehur synimin e saj për t’i dhënë fund lidhjes.
