5 nëntor 2024- Wizz Air është krenare të njoftojë se ka fituar çmimin për Grupin e Linjave Ajrore më të Qëndrueshme për Mjedisin në EMEA, për vitin 2024, në Samitin e Liderëve të Linjave Ajrore dhe Çmimet për Qëndrueshmërinë nga CAPA në Hong Kong. Ky është viti i tretë radhazi që linja ajrore merr një çmim për qëndrueshmërinë në Samitin e Liderëve të CAPA-s.
Çmimet për Ekselencën e Qëndrueshmërisë Mjedisore nga CAPA vlerësojnë linjat ajrore, aeroportet dhe furnitorët që e vendosin ndryshimin klimatik në qendër të biznesit të tyre. Çmimet janë të bazuara në kërkime të pavarura nga analistët e CAPA-s dhe strategët për reduktimin e karbonit në Envest Global, bazuar në Raportin e Vlerësimit të Qëndrueshmërisë për Linjat Ajrore të CAPA Envest Global. Ky raport shërben si një burim i plotë për industrinë, duke ofruar një vlerësim transparent të emetimeve të linjave ajrore dhe duke krijuar një sistem të pavarur të vlerësimit të qëndrueshmërisë së linjave ajrore.
Wizz Air vazhdon të jetë në krye të industrisë ajrore për reduktimin e intensitetit të emetimeve të CO2, duke arritur një performancë kryesore në këtë sektor. Kjo arritje është mundësuar nga një flotë e re dhe efikase prej 224 avionësh, mbi 60% e të cilëve, janë Airbus A321neo ultra-efikas, të cilët mund të ulin konsumin e karburantit me 20% dhe emetimet e zhurmës me 50% për fluturim. Këto përparësi janë në përputhje me synimin ambicioz të Wizz Air për të ulur intensitetin e karbonit me 25% deri në vitin 2030. Përveç rinovimit të flotës, Wizz Air synon që deri në vitin 2030 të fuqizojë 10% të fluturimeve të saj me karburant të qëndrueshëm për aviacionin (SAF). Për të arritur këtë qëllim, kompania investon në prodhues të SAF-ve dhe krijon marrëveshje me partnerë strategjikë. Përpara mandateve të BE-së për SAF-ët, grupi i linjës ajrore njoftoi dy rrugë me SAF, nga Budapesti në Barcelonë dhe nga Budapesti në Bruksel Charleroi, dhe do të mbledhë mendimet e pasagjerëve në lidhje me ndërgjegjësimin e tyre për aviacionin e qëndrueshëm përmes një ankete të veçantë, gjatë një periudhe prove.
József Váradi, Drejtori Ekzekutiv i Wizz Air, u shpreh: “Ky çmim nga CAPA reflekton përkushtimin e ekipit tonë prej 8,100 anëtarësh dhe angazhimin e përbashkët për të ofruar udhëtime ajrore më të përballueshme dhe të qëndrueshme për të gjithë. Wizz Air kryeson me krenari përpjekjet për reduktimin e intensitetit të emetimeve mesatare të karbonit duke përdorur avionët më të avancuar dhe me performancën më të mirë mjedisore. Duke përmirësuar flotën tonë nga avionët me 180 vende në ato me 239 vende, kemi arritur një nivel të jashtëzakonshëm prej 52 gramë CO2 për kilometër pasagjeri në vitin financiar 2024. Ky sukses mbështetet me një nga flotat më të reja në botë, me një moshë mesatare prej 4.43 vitesh, ku mbi 60% e avionëve janë të pajisur me motorë neo që kursejnë karburant.”
Vetëm linjat ajrore nuk mund ta arrijnë objektivin e emetimeve zero neto: e gjithë industria, përfshirë çdo aktor në ekosistem, duhet të luajë rolin e vet, nga ofruesit e karburantit, aeroportet, prodhuesit e avionëve dhe të tjerë. Çelësi për të arritur emetime zero neto është bashkëpunimi i industrisë dhe investimet strategjike në teknologji me karbon të ulët, të mbështetura nga qeveritë dhe politikat përkatëse me legjislacionin e nevojshëm dhe nxitës të efektshëm.
Marco Navarria, Drejtori i Marketingut në CAPA – Centre for Aviation, tha: “Çmimet e CAPA për Ekselencën në Qëndrueshmërinë e Aviacionit vlerësojnë liderët e qëndrueshmërisë në sektorin e udhëtimeve ajrore. Duke përdorur të dhëna të pavarura, një analizë të thelluar dhe një proces vlerësimi, këto çmime shërbejnë si një pikë referimi që nderon ata, të cilët e bëjnë performancën mjedisore pjesë kryesore të strategjisë së tyre. Fituesit e çmimeve për vitin 2024 kanë treguar një angazhim të gjerë ndaj nismave të tyre për qëndrueshmëri mjedisore, si dhe mbështetje për objektivat e industrisë për të arritur angazhimet afatgjata për reduktimin e emetimeve dhe në fund një të ardhme me zero emetime neto.”
