Armando Broja duket se me pak minuta në fushë në dy ndeshje me fanellën e Evertonit, ka bindur të gjithë tifozët e kësaj skuadre. Në rrjetet sociale, mbështetësit e Evertonit kanë vlerësuar paraqitjen e tij duke e parë si një lojtar që shumë mirë mund të luajë titullar nga minuta e parë në vend të Kalvert-Ljuin.
Statistikat e tij të grumbulluara nga “SOFASCORE” janë mbresëlënëse, edhe pse atij i mungoi goli në këtë duel dhe mundësitë afër portës kundërshtare ishin të pakta.
Në 24 minuta ai kishte 15 prekje të topit, fitoi 4 duele tokësore dhe 3 në ajër. Ndërkohë, Broja bëri tre driblime të suksesshme në 4 të tentuara. Gjithashtu, ndihmoi edhe në fazën mbrojtëse me 1 ndërhyrje dhe një spastrim zone, ndaj një ekipi shumë të fortë si Arsenali.
Të gjitha këto shifra lënë të mendohet se kontributi i tij mund të rritet nëse do të ketë më shumë kohë në dispozicion në fushën e lojës, sidomos nëse do ketë edhe pak më shumë mbështetje nga pjesa tjetër e skuadrës meqë të shtunën po bënte repart i vetëm.
