Nga Arben Çejku
Në një përpjekje diabolike për të shmangur presionin e Bullgarisë dhe BE-së për ndryshimet kushtetuese, Kryeministri i RMV-së, Mickovski, ka mbajtur një fjalim provokativ lidhur me pakicat bullgare në vendin e tij dhe në Shqipëri. Është e drejta e tij të numërojë dhe deklarojë shifra për pakicën bullgare në RMV, qoftë edhe duke thënë se nuk janë më shumë sesa 800 të tillë! (Për këtë ka marrë përgjigje sot nga Bullgaria)..
Unë shpreh habinë time, se përse Kryeministri Mickovski kërkon të përfshijë në këtë mosmarrëveshje, që ka me fqinjin e tij, Bullgarinë, edhe një vend tjetër fqinj të mirë, si Shqipëria, e cila shquhet për respektimin e të drejtave të të gjithë atyre që janë deklaruar bullgarë, maqedonë, grekë, etj. . Nuk zgjidhet një problem duke krijuar një tjetër dhe dikush duhet t’i kujtojë Kryeministrit të nderuar, se detyra dhe angazhimi i tij politik e public është që të bëjë ndryshimet kushtetuese në vendin e tij dhe se nuk është rrugëdalja nga presioni një deklaratë, si kjo që ka bërë dje:
“Pyetja e vërtetë është, pse në Maqedoni duhet të përfshijmë rreth 700-800 bullgarë që deklarojnë se gjuha e tyre amtare është bullgarishtja në Kushtetutë dhe pse Shqipëria nuk e ka kushtin t’i përfshijë këto tetë mijë në Kushtetutë? Kjo është pyetja thelbësore. Unë do të doja që të bisedonim si qytetarë maqedonas dhe të tjerë, jo vetëm maqedonas, por edhe shqiptarë, turq, boshnjakë, serbë, romë dhe vllahë. Le të shohim pse e lejuam këtë të ndodhë. Kjo është pyetja thelbësore”.
