Të dhënat personale të rreth 106 milionë personave në Shtetet e Bashkuara dhe në Kanada u vodhën pas një sulmi kibernetik kundrejt shërbimeve financiare të kompanisë Capital One, e cila është një nga prodhueset më të mëdha të kartave të kreditit në SHBA.
Sipas Capital One, të dhënat e vjedhura përfshijnë emra, adresa dhe numra telefoni të njerëzve që kanë aplikuar për karta krediti, por fatmirësisht hakerja nuk ka arritur të ketë qasje në numrat e llogarive të kartave të kreditit.
Sulmi, i cili preku rreth 100 milionë individë në SHBA dhe 6 milionë në Kanada, u identifikua më 19 korrik por u bë publik vetëm pas arrestimit të Paige Thompson nga FBI, si hakere e dyshuar.
Seanca dëgjimore për 33-vjeçaren është caktuar më 1 gusht në Sietëll, ndërsa çështja ka ringritur pikëpyetje të shumta mbi sigurinë e kartave dhe llogarive bankare.
