Këshilli i Lartë i Prokurorisë hapi me 19 mars garën për Prokurorin e Përgjithshëm. Në mesin e kandidaturave që ka shprehur interesin është dhe kryeprokurorja e përkohshme Arta Marku, të cilën mazhoranca duket se është e gatshme ta mbështesë për ti dhënë një mandat të plotë.
Zonjën Marku do ta mbështesni për një mandat të plotë?
Ulsi Manja: Pse jo, pse të mos mbështetet. Marku në atë detyrë ku është përkohësisht ka qenë një nga prokurorët e përgjithshëm që mesa mundësi dhe hapësira i ka krijuar ligji ka mbështetur deri në fund zbatimin e reformës në sistemin e drejtësisë por gara është e hapur.KLP do ti sjellë Kuvendit tre kandidatura sipas përcaktimit kushtetues dhe ligjor dhe nëse Kuvendi i Shqipërisë me 3/5 e votave i jep mbështetje njërit nga këta kandidatë le të zgjidhet më i miri.
Deputeti socialist, Ulsi Manja, i ftuar në RTV Ora refuzoi të analizojë punën e Markut në krye të Prokurorisë së Përgjithshme.
Ulsi Manja: Nuk jam këtu për të gjykuar nëse ka punuar mirë Prokurori i Përgjithshëm apo sesi ka punuar në përgjithësi sistemi i drejtësisë penale.Sot falë këmbënguljes sonë për të ngritur KLP-në i është hapur rrugë zgjedhjes së një prokurori të përgjithshëm me mandat të plotë kushtetues.
Por kryetari i Komisionit të Ligjeve Manja, theksoi se kompetencat e Prokurorit të Përgjithshëm sa i takon dosjeve penale janë inekzistente pas ndryshimeve kushtetuese.
Ulsi Manja: Ka një përceptrim që reforma në sistemin e drejtësisë është vetëm vettingu. Jo, është vetëm një nga aspektet. Reforma në drejtësi është shumë më e gjerë sesa kaq. Është një reformë që përfshin një mënyrë krejtësisht të re të re të organizimit dhe funksionimit të gjykatave por edhe sistemit të drejtësisë penale në vend.Prokurorinë ne në Kushtetutë nga një Prokurori e centralizuar e kemi definuar si një organ të pavarur.Me 1 gusht të 2017 ka hyrë në fuqi edhe kodi i ri i procedurës penale dhe Shqipëria nuk ka më një Prokuror të Përgjithshëm. Shqipëria me Kushtetutë dhe me ligj ka një prokuror hetimi të fortë. Pesha e prokurorit të përgjithshëm mbi hetimin është inekzistente.
