Ish-deputetja e Partisë Demokratike, Jorida Tabaku e ndodhur në zonën e Bregut të Lumit aty ku ka nisur prishja e banesav,e ka deklaruar në një prononcim për mediat se policia ka dhunuar e tërhequr zbarrë banorët që kërkojnë të drejtën e tyre.
Duke e cilësuar barbare sjelljen e tyre, ish-deputetja i kërkoi Avokatit të Popullit por edhe ambasadorëve të akredituar në vendin tonë të jenë të pranishëm për të parë se si shkelen të drejtat e shqiptarëve.
“Dhunë e paprecedent, ky shtet që ka kriminalizuar çdo strukturë të tij, s’ka sjellë kaq polici as për kriminelët më të rrezikshëm, ndërkohë që sot këtu për gratë e fëmijët ka sjellë kaq shumë policë. Unë jam pa fjalë, janë dhunuar e janë rrahur zonjat. Fëmijët janë zgjuar nga gjumi e nuk janë lejuar të shkojnë në shkolla. Ata po dridhen nga i ftohti sepse janë nxjerrë me dhunë nga shtëpitë e tyre. Nuk duan asgjë më shumë, vetëm trajtim të barabartë si mbi 200 familje të tjetra që janë prekur nga ku project”,- tha Tabaku ndër të tjera.
Jorida Tabaku, ish-deputetja e PD ka përshkruar situatën e rëndë në Bregun e Lumit dhe i ka bërë thirrje qytetarëve të Tiranës të vijnë e t’i bashkohen këtyre 30 familjeve që po dhunohen si s’ka ndodhur kurrë më parë, pasi nesër me siguri do të jetë radha e tyre. Shteti ka rënë, theksoi Tabaku.
“Dua të sqaroj që në fillim, – tha Tabaku, – se çfarë kërkohet këtu. Këta banorë duan të trajtohen si 200 familjet e para në këtë zonë, të kompensohen. I bëj thirrje AP të vijë të shohë dhunën këtu, të shohë shkeljet që janë bërë këtu.
I bëj thirrje ambasadorëve të shikojnë si po dhunohet prona, themeli i të drejtës së çdo njeriu. Këta njerëz nuk po kërkojnë diçka që nuk është tyre, por diçka që e kanë ngritur me mund dhe gjak.
I bëj thirrje qytetarëve të Tiranës të ngrihen sepse nesër është radha e tyre. Sot fëmijët e tyre janë ngrohtë në shtëpi, në shkolla, kurse fëmijët këtu…
Shteti ka rënë: kur nuk mbrohen të dobëtit, në nevojë, atëhërë çfarë? Sot shteti ka dhunuar 30 banorë.
Ju e patë dje që banorët nuk kishin asnjë informacion se çfarë do të ndodhte. Sot në orët e para të mëngjesit unë dhe zoti Balliu jemi njoftuar për atë që po ndodhte. Një pjesë familjarësh janë në komisariat, një pjesë tek Trauma, po operohet, një 76-vjeçar është çarë në kokë. Kjo që ka ndodhur këtu nuk besoj se ka ndodhur në asnjë vend tjetër të Shqipërisë, po dhe në asnjë vend tjetër të botës së tretë!”
