Takimi elektoral i kryeministrit Edi Rama u shoqërua me protesta edhe në Përmet.
Gjatë fjalës së tij, Rama aludoi se opozita do që zgjedhjet të zhvillohen në muajin tetor.
Edi Rama: Kur të jetë gati Luli dhe kur të thotë filxhani që doli data tamam, Liri cakto këtë datën këtu se shoh një 2-sh edhe duhet të jetë 21 dhe shiko është edhe një ‘T’ këtu, nuk e di a është tetor, a nuk është tetor, por ti shikoje vet.
Kreu i qeverisë theksoi se 30 qershori nuk është lojë, por baza e ndërtimit të një shteti ligjor.
Edi Rama: Madje kishte edhe ndër socialistët që thoshin, po çna duhet ne, ne në rregull jemi. Shtyjini. S’duan këta kur të jenë gati le të vijnë ne i mundim prap. Mirëpo kjo nuk është një lojë me një top lecke, me porta të vogla në lagje. Kjo ka të bëjë me bazën e shtetit që ne po ndërtojmë dhe të shoqërisë që kemi zgjedhur, të shoqërisë demokratike.
Protestat e opozitës që kërkojnë dorëheqjen e tij, Rama I cilësoi si organizime që kërkojnë të prishin imazhin e Shqipërisë në prag të çeljes së negociatave me BE.
Edi Rama: Protestat mund të vazhdojnë ata jo me molotov, ata mund të hidhen edhe përpjetë edhe vetë mund të kthehen në molotov, qeverinë nuk e rrëzojnë dot.
Në mbyllje të fjalës , Rama përsëriti idenë se aksioni opozitar është pasojë e frikës nga reforma në drejtësi, frikë që do ta mbjellë dhe te populli.
