Që Barcelona po kalon një sezon aspak pozitiv, kjo dihej. Por humbja në “El Clasico” dhe dorëzimi i kryesimit te rivalët e përjetshëm të Real Madrid ka përshtjelluar sërish atmosferën në klubin katalunjas. I përfshirë prej javësh në përplasje të brendëshme klub-lojtarë, situata nuk po përmirësohet. Përkundrazi, ecuria e skuadrës në fushë vetëm po agravon gjëndjen.
Mediat katalunjase kanë nisur të kërkojnë shkaqet, ndërsa për momentin takohen në një pikë. Më saktë në një emër dhe ai është Lionel Messi. Sulmuesi argjentinas ka humbur shkëlqimin dhe rolin e atij që bënte diferencën edhe në disa ndeshje kur ekipi nuk luante mirë. Në këtë sezon “Pleshti” është pasqyrimi i krizës së Barcelonës. Kjo konfirmohet edhe nga shifrat. Ndrsyhe nga ajo që jemi mësuar ta shohim, Lionel Messi, vrapon më pak, prek më pak topa dhe ajo që është më e rëndësishme shënon më pak.
Në këtë paraqitje të sulmuesit argjentinas ndikon humori i keq personal pas përplasjeve me drejtuesit e klubit, por edhe loja e skuadrës, ku sipas mediave shumë pranë klubit “blaugrana”, ai ndjehet i vetëm në fushë. Kjo situatë nuk ndihmon as në planet afatgjata, pasi ditë pas dite vetë Lionel Messi po I forcon bindjen vetes se ndoshta qëndrimi te Barcelona deri në fund të karrierës, nuk është zgjedhja e duhur.