Vazhdojnë mesazhet me eksploziv në Fushë Krujë. Një sasi tritoli ka shpërthyer pranë portës së një banese. Fatmirësisht nga shpërthimi ka vetëm dëme materiale.
“Më datë 15.07.2020, rreth orës 02:15, jashtë rrethimit të banesës së shtetasit E.K., 22 vjeç, në Fushë Krujë, ka shpërthyer një sasi lëndë plasëse, nga e cila ka vetëm dëme të vogla materiale” njoftoi policia.
Vetë pronari i banesës, E.K, 22 vjeç, thotë se nuk ka konflikte. Grupi hetimor po punon për zbardhjen e ngjarjes, identifikimin dhe kapjen e autorëve.
Ky është rasti i dytë në harkun e pak ditëve në Fushë Krujë.
Mbrëmjen e 12 korrikut u kërcënua me eksploziv familja e 17-vjeçares nga Fushë Kruja që denoncoi se ishte shfrytëzuar seksualisht nga 6 persona nga të cilët 4 janë arrestuar ndërsa dy janë shpallur në kërkim.
Një pako lëndë plasëse artizanale u hodh rreth mesnatës në ambientet e jashtme të banesës së familjes.
Fatmirësisht, ekspozivi nuk shpërtheu, por ngjarja ka shkaktoi panik mes anëtarëve të familjes.
Një 23-vjeçar në kërkim si pjesë e grupit që shfrytëzuan për prostitucion 17-vjeçaren është autori i dyshuar.
