Këshilli Politik për Reformën Zgjedhore rimblidhet sot në orën 11:00 për të diskutuar mbi propozimin e 28 deputetëve të opozitës parlamentare për ndryshimin e dy neneve në Kushtetutë
Në riformulimin që propozojnë të bëjnë në nenin 64 dhe 68 të Kushtetutës, deputetët e rinj në Parlament, të mbështetur edhe nga maxhoranca, kërkojnë që të heqin koalicionet parazgjedhore, vendosjen e një pragu kombëtar dhe hapjen e pjesshme të listave.
Mbledhja e Këshillit Politik vjen pas kërkesës së Partisë Socialiste për të diskutuar çështjet që dalin jashtë Marrëveshjes së 5 Qershorit.
PD dhe opozita kanë argumentuar se ndryshimet e njëanshme kushtetuese e prishin paktin e 5 Qershorit, pasi koalicionet parazgjedhore janë pjesë e draftit të dakordësuar me ndërmjetësim ndërkombëtar.
Po ashtu opozita dhe PD kërkojnë që drafti i dakortësuar sipas Marrëveshjes së 5 Qershorit duhet të miratohet pa asnjë ndryshim.
Kjo do të thotë se çështjet e dakordësuara aty nuk mund të rihapen në mbledhjen e sotme.
Miratimin pa ndryshime të Marrëveshjes e kanë kërkuar gjithashtu edhe SHBA dhe BE.
Në reagimet e tyre, vende kyç si Gjermania, kanë paralajëmëruar se miratimi pa konsensus i ndryshimeve kushtetuese, do të sillte bllokimin e nisjes së negociatave.
Nga maxhoranca, përveç Damian Gjiknurit që përfaqësonte më herët Partinë Socialiste në Reformën zgjedhore, do të jetë i pranishëm edhe Kryeministri Edi Rama. Ndërkohë, nga opozita e bashkuar nuk do të jetë kryedemokrati Lulzim Basha, por sekretari i përgjithshëm i PD-së, Gazment Bardhi.
Po ashtu, do të ketë më shumë përfaqësues edhe nga opozita parlamentare. Përveç Rudina Hajdarit, e cila ka qenë pjesë edhe më herët e tryezës, do të bashkohet edhe Myslim Murrizi. Ai u propozua që të zëvendësonte më herët Rudina Hajdarin nga tri grupe parlamentare të opozitës në Parlament.
