Nga Patrik Sadikaj
Që në opozitë, kur hodhi themelet Rilindjes së re, Edi Rama ka treguar qartazi për ata që dinë të kuptojnë e të shohin, se do të ishte një populist hipur mbi kalin e prapagandës dhe me portretin e fasadës.
Në fakt këtë e provoi për fat të keq edhe në qeverisje.
Që prej 7 vitesh nuk ka bërë asgjë tjetër vetëm sa ka kuruar imazhin e tij me propagandë duke ndërtuar fasada që fshehin të vërtetën e hidhur brenda.
Për një njeri që keqqeveris është e kotë të bëjë gjithçka për ti ngjarë Ismail Qemalit.
Ismail Qemal nuk mund të jetë asnjëherë dikush që e çon qoftë edhe në mëndje ndarjen e Kosovës. Njeriu i pavarësisë luftoi për të bashkuar çdo cep të vendit këtu e përtej një shekulli më parë.
Mund të shkosh e të organizosh shfaqje sa të duash nën hijen e portretit të Skënderbeut, por nuk do të thotë se je ai.
Skenderbeu nuk u vuri zgjedhën shqiptarëve dhe nuk sakrifikoi pasuritë e vendit për vete dhe miqtë e tij, por sakrifikoi gjithçka kish për të Arbërinë e tij.
Mjekrra që rritet herë si e Ismail Qemalit dhe herë si e Skenderbeut, duke besuar krahasimet që i bëjnë ministret e tij, nuk e shpëton dot Edi Ramën nga mëkatet që ka bërë me këtë vend.
Nuk po hyj të flas për tendera e PPP.
Po ndalem në dy çështje që janë aktuale sot: Gjobat e Arbitrazhit për rastin Bechetti dhe së fundmi për rastin e kompanisë greke Aktor.
Janë dy haraçe që na janë ngarkuar në kurriz me dy vendime të shpejta gjykate. E para 109 milion euro dhe e dyta 44 milion euro.
Një gjobë e rëndë për xhepat e grisur të shqiptarëve që në fund të ditës mbeten vetëm me imazhin prej patrioti fasadë të kryeministrit që pozon herë tek portreti i Ismailit e herë tek portreti i Gjergj Kastriotit.
Jo Edo, nuk mund të jesh njëkohësisht patriot në dukje ndërsa shqiptarëve u ngul thikën 153 milion euroshe në kurriz.
Nuk fshihet dot barra që i ke vënë në kurriz shqiptarëve nga mjekra patriotike e Ismail Qemalit, zoti kryeministër. Nuk fshihet as nga shfaqja me peshk e haviar tek Busti i Skenderbeut në Elbasan.
Ajo barrë e rëndë është aty, duke e kërrusur çdo ditë e më shumë kurrizin e lodhur të shqiptarëve.
