Kreu i shtetit, Ilir Meta i është përgjigjur deklaratës së kryeministrit Edi Rama, për zgjedhjen President të tij në 2017.
Me një shënim në facebook, ku ka postuar fjalën e tij në Kuvend, pas votimit që e shpalli President, Meta thotë se ka zgjedhur gjithmonë demokracinë para pushtetit.
“Çdo politikan është gjithnjë midis dy raporteve, pushtetit dhe demokracisë, unë kam zgjedhur dhe do zgjedh gjithmonë demokracinë, në raport me pushtetin. Unë kam pasur këtë mundësi vetëm falë demokracisë dhe mundësive që ajo na ka dhënë jo vetëm mua, por edhe juve dhe shumë e shumë shqiptarëve të tjerë”, deklaronte Meta më 28 prill të tre viteve më parë.
“Meta ka mbajtur çdo premtim për mbrojtjen e Kushtetutës dhe interesit kombëtar”, shkruan ai në facebook.
Ndërkohë ai paralajmëron Ramën që të respektojë marrëveshjen e 5 qershorit, dhe të refelktojë, “se përndryshe në 25 Prill do të ketë jo vetëm një President ‘të shkalluar’, por edhe tre milionë shqiptarë ‘të shkalluar’”.
Postimi i plotë:
Meqënëse Kryepinoku Rilindas u justifikua për zgjedhjen e detyruar para tre vitesh të “Presidentit të shkalluar”, më duhet t’ju kujtoj të gjithë socialistëve se Ilir Meta ka mbajtur çdo premtim për mbrojtjen e Kushtetutës dhe interesit kombëtar.
Unë u kam bërë të qartë se midis Pushtetit dhe Demokracisë, kam zgjedhur gjithmonë Demokracinë se pushtet ka edhe në vendet jodemokratike, ku të drejtat e qytetarëve shtypen e dhunohen.
Tani ju e kuptoni se çdo njeri që nuk blihet e frikësohet prej tij është “i shkalluar”.
Bën mirë të reflektojë dhe të respektojë 5 Qershorin se përndryshe në 25 Prill do të ketë jo vetëm një President “të shkalluar”, por edhe tre milionë shqiptarë “të shkalluar” që do shkallmojnë me votë dhe çdo mjet legjitim ëndrrat e tij për të blerë e trembur popullin shqiptar për një grusht oligarkësh e banditësh.
