“Mjekët dhe infermierët do të detyrohen të zgjedhin cilët pacientë do të trajtojnë, kush do të marrë oksigjen dhe kush jo, kush do të jetojë dhe kush do të vdesë”. Kështu tha kryeministri i Britanisë së Madhe Boris Johnson teksa njoftoi izolimin për 4 javë.
Johnson njoftoi bllokimin e dytë kombëtar për të parandaluar një katastrofë mjekësore.
Dyqanet me gjëra esenciale do të jenë të hapura dhe njerëzit nuk kanë nevojë “të blejnë ushqime rezervë”, porosit Johnson, duke shtuar se njerëzit që nuk mund të punojnë nga shtëpitë e tyre, mund të vazhdojnë punën nga zyrat.
Qytetarët do të mund të dalin nga shtëpitë e tyre për kujdes shëndetësor, për furnizime me ushqime, për ushtrime në natyrë, shtoi Johnson.
Ai tha se sektori i gastronomisë do të mbyllet, por shërbimi “take away” apo “merre me vete” do të funksionojnë.
Johnson tha se Krishtlindjet e këtij viti do të jenë ndryshe, por shpreson që me masat e marrë njerëzit të festojnë së bashku.
Por ndryshe nga kufizimet në pranverë, shkollat, kolegjet dhe universitetet do të qëndrojnë të hapura.
Masat do të zgjasin deri ne 2 dhjetor.
Numri i përgjithshëm i rasteve me koronavirus në Mbretëri të Bashkuar ka kaluar shifrën prej 1 milion. Vetëm gjatë shtatë ditëve të fundit, ky shtet ka regjistruar mesatarisht 23,000 raste të reja me koronavirus.
