Korrupsioni i punonjësve të kontrollit teknik kanë detyruar një grup shoferësh të Gjirokastrës që t’i drejtohen emisionit Fiks Fare. Kamera e “Fiks Fare” dokumentoi një tjetër rast korrupsioni, ku një punonjës i Qendrës së Kontrollit Teknik të Automjeteve në Gjirokastër merr 3 mijë lekë për të kaluar një makinë në kolaudim. Për më tepër mjeti kishte probleme në dokumentacion.
Qytetarët në telefonatat e shumta që kishin mbërritur ne sekretarin e emisionit “Fiks Fare” shpreheshin se të marrësh kolaudimin në Gjirokastër detyrimisht duhet të lësh lekë në kroskotin e makinës. Pavarësisht nëse mjeti ka apo jo probleme që mundet të penalizojnë kalimin e tij në pikën e kontrollit.
Për të vërtetuar këtë denoncim gazetarët e Fiksit fillimisht kanë siguruar një mjet nga një qytetar, i cili ishte në radhë për të kaluar mjetin në pikën e kontrollit në Gjirokastër. Frika e qytetarit ishte se mjeti nuk do ta kalonte kolaudimin, pasi ai i kishte veshur xhamat e makinës me ngjyrë të errët pa u pajisur me certifikatën e errësimit të xhamave.
Gazetarët pasi kanë bërë të mundur sigurimin e mjetit, kanë vendosur në kroskotin e makinës, poshtë kastetofonit në një vend të dukshëm, 3 mijë lekë. Ndërsa letrat e mjetit mbi kroskot.
Në asnjë moment gazetari nuk ka komunikuar apo ofruar lekë punonjësit të pikës së kolaudimit të mjeteve në Gjirokastër. Punonjësi ka marrë makinën dhe për pak minuta ka përfunduar edhe kontrollin. Në përfundim të kontrollit të mjetit punonjësi i SGS Gjirokastër, ka marrë parat duke e kaluar mjetin pa e kontrolluar imtësisht duke ia kthyer gazetarit të Fiksit. Ndërkohë që mjeti edhe në pamje të lirë dukej qartësisht që i kishte xhamat e errësuar, por punonjësi nuk ka kërkuar certifikatën e tyre në asnjë moment.
Udhëzimi nr. 5 dt 7.10.2019 për certifikimin e xhamave të errësuar në pikën 11 të tij citon “Organet e përcaktuara për të kryer kontrollin teknik të autoveturave, nuk duhet të kryejnë kontrollin teknik të autoveturave me xhama të errësuar të pa miratuar e certifikuar nga Drejtoria e Përgjithshme e Shërbimeve të Transportit Rrugor”. Por ka qenë pikërisht ryshfeti prej 3 mijë lekësh të lëna në kroskotin e mjetit, që punonjësi i kontrollit teknik të ‘mbylli’ sytë e të kalojë me sukses mjetin në pikën e kolaudimit Gjirokastër.
