Policia e Tiranës ka arrestuar 5 shtetas nga 33 në 37 vjeç në një lokal në Tiranë i konstatuar i hapur tej fashës orare të lejuar.
Por ndërsa policia shkoi për kontroll pasi nuk zbatoheshin masat antiCovid e shkelje orari i kufizimit, zbuloi se lokali në fjalë ishte kthyer në një çerdhe ku konsumohej kokainë dhe hashash. Mes 5 të arrestuarve ishte edhe Administratori i lokalit qe ishte pershtatur per perdorim droge, Margen Islami.
NJOFTIMI I PLOTË
Tiranë
U konstatuan jashtë orarit të lejuar në ambientet e lokalit që e kishin përshtatur për përdorim droge, vihen në pranga 5 shtetas.
Sekuestrohen lëndë narkotike kokainë e kanabis dhe sende të tjera të kundërligjshme.
Punonjësit e Policisë të Seksionit për Hetimin e Narkotikëve, bazuar në informacionet e marra në rrugë operative se një lokal që qëndronte i hapur jashtë fashës orare, në kundërshtim me masat anticovid, ishte përshtatur për shitje dhe konsumin të lëndëve narkotike kokainë, kanë organizuar punën dhe kanë ushtruar kontroll në ambientet e këtij subjekti.
Gjatë kontrollit në subjektin që administrohej nga shtetasi M. I. u gjetën dhe u sekuestruan një sasi me lëndë narkotike kanabis dhe kokainë, 1 peshore elektronike dhe sende të tjera të kundërligjshme.
Në përfundim të veprimeve u arrestuan në flagrancë administratori i lokalit, shtetasi M. I., 36 vjeç, për veprat penale “Prodhimi dhe shitja e narkotikëve”, e kryer në bashkëpunim dhe “Përshtatja e lokalit për përdorim droge”, dhe klientët që u gjetën në lokal, shtetasit R. I., 37 vjeç, P. S., 33 vjeç, M. S., 29 vjeç dhe L. I., 33 vjeç, për veprën penale “Prodhim dhe shitja e narkotikëve”.
Materialet i kaluan Prokurorisë së Rrethit Gjyqësor Tiranë, për veprime të mëtejshme.
