Policia italiane ka arrestuar një shqiptar dhe dy të tjerë i ka shpallur në kërkim, pasi akuzohen për grabitje në disa qytete të vendit.
Ngjarja ndodhi në provincën e Vicenzas.
Shqiptarët kishin pikasur ikjen me pushime të pronarit të vilës, ndërsa ishin futur për ta grabitur, por fqinjët i kanë dalluar dhe kanë njoftuar menjëherë policinë.
Dy patrulla shkuan me shpejtësi, ndërsa tre shqiptarët me një “Fiat” u larguan nga vendi i ngjarjes.
Policia ndoqi makinën, e cila në një moment ndaloi dhe dy nga shqiptarët arritën që të zhdukeshin në errësirë, ndërsa shoferi ra në pranga.
Nga kontrolli në makinë u gjetën dhe u sekuestruan një shumë e konsiderueshme në euro, sende të tjera, por edhe mjete që përdornin hajdutët për të hapur vilat.
