Dalja e sotme e ministres së Arsimit për të njoftuar vendimin e ri për fillimin e Vitit të Ri Shkollor i ka bërë konfuz prindërit, fëmijët dhe mësuesit.
Pyetjet që kanë përgjigje
1-Kur nis Viti i ri Shkollor?
Viti i ri Shkollor 2021 – 2022 nis më 27 shtator 2021
2- Po 13 shtatori?
Në qershor 2021 ishte caktuar data 13 shtator si ditë e fillimit zyrtar të vitit të ri shkollor, por pas vlerësimeve dhe faktit që një pjesë e mirë e vitit të kaluar shkollor u bë online u vendos përfundimisht që mësimi plotësues të zgjatet me 4 javë.
3- Kur duhet të paraqitet fëmija im në shkollë?
Fëmijët e arsimit parauniversitar mund të shkojnë në shkollë që më 1 shtator. Por nga 1 shtatori deri më 24 shtator shkollat do të jenë të hapura për mësim plotësues.
4- A është e detyrueshme prania e fëmijës?
Jo, nxënësit nuk janë të detyruar të shkojnë çdo ditë në shkollë gjatë kësaj 4 jave të mësimit plotësues
5- Po për mësuesit?
Mësuesit dhe të gjitha stafet shkollore do të jenë aty me kohë të plotë për të ofruar krahas mësimit plotësues, edhe veprimtari të ndryshme sportive, artistike dhe kulturore.
6 -Po klasa e parë kur nis?
Fëmijët e klasës së parë do të paraqiten në shkollë më 27 shtator.
7- Kur mbyllet viti i ri shkollor 2021 – 2022?
Për arsimin bazë nga klasa I – IX viti shkollor mbyllet më 17 qershor 2022
Për klasa X- XI viti shkollor mbyllet më 24 qershor 2022
Matura 2022 mbyll vitin shkollor më 8 qershor 2022
8- Çfarë mund të bëjë, veç përsëritjes, fëmija në shkollë nga 1 shtatori – 24 shtator?
Krahas mësimit plotësues MAS u ka kërkuar mësuesve të bëjnë edhe veprimtari të ndryshme sportive, artistike dhe kulturore.
9- Po masat anticovid a do të jenë?
Deri në një vendim të dytë do të vijojë të respektohet protokolli i covid 19.
