Partia Demokratike akuzon Kryeministrin Edi Rama se lufta personale e tij me Francesco Becchettin do t’i kushtojë shqiptarëve 120 milionë euro, duke iu referuar disa raportimeve se biznesmeni italian ka nisur ekzekutimin e gjobës përmes bllokimit të aseteve të shtetit shqiptar jashtë vendit.
“Kjo është shuma me interesat aktuale që çdo familje do të paguajë nga xhepat e saj. Mediat raportojnë se kjo shumë ka filluar të arkëtohet. Institucionet nuk bëjnë transparencë, ndërsa përgjegjësi për këtë faturë mohon dhe mashtron, duke e përdorur shtetin si mburojë për t’u mbrojtur nga dëmi i madh ekonomik që u ka shkaktuar shqiptarëve”, deklaroi deputetja e zgjedhur e PD, Jorida Tabaku.
Tabaku thotë se PD ka kallëzuar në SPAK gjithë personat e përfshirë në këtë çështje dhe teksa impakti për buxhetin e shtetit po bëhet real, kjo dosje duhet të hetohet sa më shpejt.
“Ky abuzim me pushtetin duhet ndëshkuar, sepse Shqipëria, e varfëruar dhe e vjedhur nga ky regjim, 120 milionë euro duhet t’i përdorë për të ndërtuar shkolla, spitale dhe infrastrukturë, jo për të paguar luftën personale të Edi Ramës”, u shpreh ajo.
“Shqiptarët i kanë paguar shtrenjtë dështimet dhe korrupsionin e këtij regjimi, tani duhet të paguajë Rama dhe shpura e tij!”, mbyllet reagimi i Tabakut.
