Bujar Leskaj: 15 qershor 1920- Drashovica prefekturë, me vendim të Komitetit të “Mbrojtjes Kombëtare”!

Te ura në Drashovicë,

Portë e madhe e Labërisë,

ku shkojnë e kthehen stuhitë!

Kush mund ta përjetësonte më bukur se populli?

Kush mund ta përmblidhte më mirë se vargjet popullore historinë dhe rëndësinë e Drashovicës në Historinë e Shqipërisë?

Armiqtë gjithmonë kanë dashur ta kalojnë gjithnjë urën e Drashovicës, “urën – kufi”, sepse duke kaluar këtë urë, Labëria do të ishte e pushtuar dhe cilido pushtues do të zotëronte jo vetëm majat e larta të saj, por do të zotëronte shpirtin e Labërisë…

Por një gjë e tillë nuk do të ndodhte kurrë! Drashovica do të qëndronte aty, si monument, si simbol luftërave, rezistencës, shpirtit liridashës të Labërisë e Shqipërisë; si portë hyrëse dhe lidhëse e Historisë e epokave!

Duke qenë në kufi dhe portë hyrëse e Labërisë do të qëndronte në kufi të Historisë, brenda historisë dhe pjesë e saj!

– Në vitin 1920, Lufta e Vlorës që përfundoi me çlirimin e Vlorës nga italianët

– Në 1943, Epopeja e Drashovicës, luftë frontale popullore kundër nazistëve gjermanë.

Në datën 15 qershor 1920, 102 vite më parë, Komiteti i “Mbrojtjes Kombëtare”, vendosi selinë e tij në Drashovicë.

Drashovica shpallet prefekturë dhe Vlora nënprefekturë që varej prej saj.

Përbërja e “qeverisë së Drashovicës”, ishte si më poshtë:

Qazim Kokoshi, prefekt i Drashovicës, kryetar i “Qeverisë së Drashovicës”.

Kapiten Qazim Koculi, Komandant i Përgjithshëm i Trupave Kombëtare.

Major Ahmet Lepenica, Komandant i Përgjithshëm i Xhandarmërisë, dhe mbeti Shef Shtabi, nënkomandant i Luftës. Shero Emin Agaj, u emërua komisar policie, me sekretar Dhimitër Konomi.

Neki Xheneti u emrua kryetar i gjykatës me gjyqtarë Agja Libohovën, Sif Kedhin,etj.

Avdul Kuçi, u emërua Prokur i Përgjithshëm dhe ndihmësprokuror Rasim Babameton.

Daut Sefer Gjikondi dhe Halim Xhelo, u caktuan sekretarë të Komitetit.

Sezai Çomo, u emërua drejtor i spitalit të Kotës ku mjekoheshin të plagosurit dhe të sëmurët.

Beso Gega, u emërua farmacist.

Në datën 14 shtator 2016, duke vlerësuar rolin e Drashovisës, Labërisë e patriotëve të tjerë shqiptarë, Presidenti i Republikës, Bujar Nishani, nderoi fshatin Drashovicë me Dekoratën “Nderi i Kombit”.