Presidenti turk Rexhep Tajip Erdogan se beson se lideri rus Vladimir Putin po kërkon t’i japë fund luftës që filloi në Ukrainë dhe se do të bëhet një “hap i rëndësishëm”.
Ai u shpreh se përshtypja iu krijua pas bisedimeve të fundit me homologun e tij, i cili sipas Erdogan i ka thënë se dëshironte “t’i jepte fund kësaj sa më shpejt të jetë e mundur”.
Ukraina ka rimarrë pjesë të territorit të saj këtë muaj. Udhëheqësi turk tregoi se gjërat ishin “mjaft problematike” për Rusinë.
Erdogan tregoi se ka pasur “diskutime shumë të gjera” me Putinin në një samit në Uzbekistan javën e kaluar.
Në një intervistë me PBS, udhëheqësi turk tha se krijoi përshtypjen se presidenti rus dëshironte një fund të shpejtë të luftës.
“Ai në fakt po më tregon se është i gatshëm t’i japë fund kësaj sa më shpejt të jetë e mundur”, tha Erdogan. “Kjo ishte përshtypja ime, sepse mënyra se si po shkojnë gjërat tani është mjaft problematike.”
Ai tha gjithashtu se 200 pengje do të shkëmbehen së shpejti midis dy palëve. Ai nuk dha detaje të mëtejshme se kush do të përfshihej në një shkëmbim të tillë të burgosurish.
Erdogan ka kërkuar vazhdimisht të ndërmjetësojë gjatë luftës, duke promovuar një qëndrim “të balancuar” për Turqinë anëtare të NATO-s, ndërsa kundërshton sanksionet perëndimore ndaj Rusisë.
Ai ndihmoi OKB-në të ndërmjetësonte në rifillimin e eksporteve të grurit nga Ukraina dhe tha javën e kaluar se po përpiqej të organizonte bisedime të drejtpërdrejta për armëpushim.
Ndërkohë, dy muaj pasi forcat ruse morën kontrollin mbi të gjithë rajonin lindor të Luhanskut, Ukraina ka rimarrë një pjesë të territorit.
Udhëheqësi ukrainas i Luhansk, Serhiy Haidai tha se forcat ruse ishin tërhequr nga fshati Bilohorivka. Presidenti Volodymyr Zelensky tha se “pushtuesit janë në panik”. Në fillim të këtij muaji, Erdogan akuzoi Perëndimin për miratimin e një politike “provokimi” ndaj Rusisë dhe paralajmëroi se lufta nuk ka gjasa të përfundojë “së shpejti”.
Javën e kaluar, udhëheqësi rus tha se ishte i hapur për të takuar presidentin ukrainas, por se Zelensky nuk ishte.
Ai i tha kryeministrit të Indisë se donte t’i jepte fund luftimeve “sa më shpejt të ishte e mundur”. Megjithatë, Rusia nuk ka dhënë asnjë shenjë se është e gatshme të pranojë kërkesat e Kievit për një tërheqje të plotë nga territori ukrainas, duke përfshirë zonat e pushtuara në 2014.
Krimea u aneksua nga Rusia në atë kohë, dhe tani ish-presidenti Dmitry Medvedev ka thënë se separatistët e mbështetur nga Rusia duhet të zhvillojnë “referendume” për aneksimin e territoreve të Luhanskut dhe Donetsk, të cilat njihen si Donbas.
