Me 5 vota të anëtarëve të KLP-së, Altin Dumani është zgjedhur kryetari i ri i Prokurorisë së Posacme kundër Korrupsionit dhe Krimit të Organizuar (SPAK).
Ai do të marrë mandatin e kreut të SPAK më 19 dhjetor, duke zëvendësuar kështu në këtë post, Arben Krajën.
Ndërkohë në garën e zhvilluar sot në KLP, morën pjesë edhe kandidatët Adnan Xholi dhe Edvin Kondili të cilët morën respektivisht 1 dhe 4 vota.
KUSH ËSHTË ALTIN DUMANI
Altin Dumani ka shërbyer për 3 vite si prokuror i SPAK dhe udhëhoqi operacionin ku u arrestua ish-gjyqtarja e Krujës, Enkeleda Hoxha.
Dumani vjen nga radhët e Prokurorisë së Apelit. Ai është lindur në Shupenzë të Dibrës dhe është nga të parët që drejtoi njësinë Task Forcë, ngritur vite më parë për të luftuar krimin e jakave të bardha.
Ka një karrierë prej 20 vitesh si prokuror, në mars të vitit 1999, ka shkelur për herë të parë në prokurori, me detyrë në Sarandë.
Ai u bë drejtues prokurorie për herë të parë në Tropojë, në vitin 2000, një post sipas Dumanit që u refuzua nga shumë të tjerë për shkak të çështjeve problematike atje.
Dumani gjithashtu ka udhëhequr hetimet për 29 të pandehur për ngjarjen e Gërdecit.
Kur u pyet se pse vendosi që të jetë pjesë e SPAK, Dumani u përgjigj duke thënë se ka lënë menjënanë komoditetin e prokurorisë së apelit dhe do ti përkushtohet luftës ndaj krimit.
“Lufta ndaj krimit është më prioritare se komoditeti zyrës”.
