Marash Kumbulla po bëhet gati për një periudhë shumë të gjatë larg fushave të lojës. Periudhë që sipas mediave italiane, përkon me mbylljen para kohe të aktiviteteve futbollistike për mbrojtësin e kombëtares shqiptare sa i përket vitit 2023.
Ndeshja ndaj Milanit disa ditë më parë ka rezultuar fatale për mbrojtësin shqiptar. Përplasja e tij me Zhiru soli një dëmtim në ligamentin kroçat dhe u kuptua menjëherë se situata ishte problematike. “Corriere Dello Sport” bën të ditur se mbrojtësit iu bë e qartë se i nevojitej medoemos ndërhyrja kirurgjikale dhe ai nisi të kërkonte një klinikë të përshtatshme për të.
Sot është mësuar se Kumbulla ka vendosur të operohet në klinikën e specializuar “La Madonnina” në Milano, me klubin e Romës që do të ndjekë më pas hap pas hapi rikuperimin e tij për ta kthyer në fushat e lojës.
Por pikërisht ky rikuperim është padyshim lajmi më i keq për mbrojtësin shqiptar, pasi nga një ndërhyrje e tillë, duhen 6 deri në 8 muaj nëse gjithçka shkon sipas planit, për ta parë në fushën e lojës që nga momenti i operacionit. Kjo do të thotë se për Kumbullën nuk ka kthim në fushë për vitin 2023 dhe se 23-vjeçari do të jetë përsëri plotësisht në dispozicion të Romës vetëm në janarin e vitit 2024. PANORAMASPORT.AL